चितवनको मुख्य सडक नारायणगढ क्षेत्रको अवस्था: सडकमै पोखरी, यात्रुलाई सास्ती

चितवन, फागुन १४-

पानी पर्‍यो कि सडक जलमग्न । यो चितवनको मुख्य सडक नारायणगढ क्षेत्रको अवस्था हो । तर, यो समाधान भन्दा अझ बिकराल बन्दै गएको छ । पानी पर्‍यो  कि सडकका दाँयाबाँया जलमग्न हुन्छन् । नारायगढको लायन्सचोकदेखि पुल्चोक सम्मको अवस्था यस्तै छ । पानीको मुल फुटे झै सडकको छेउबाट ढलको पानी निस्कन्छ, अनि पैदलयात्री र मोटरसाइकल चालकको बिजोग देखिन्छ । जलमग्न पानीमा बजारको टल्किएको छाया प्रष्टै देख्न सकिन्छ ।

नारायणगढको शहिदचोकमा दशकौं अघिदेखि फलफूल बेच्दै आएकी अन्जनी पाण्डेले नारायणगढ दिनप्रतिदिन कुरुप बन्दै गएमा चिन्ता व्यक्त गरिन् । उनले भनिन्, ‘देशकै मुटु मानिएको नारायणगढ बजारमा अहिले पानीको तालले हिडिसाध्य छैन । सवारीसाधनले छ्यापेको हिलो पखाल्दैमा हैरान भइन्छ ।’ महानगरपालिका भइसक्दा पनि बजारको अवस्था नसुध्रिएकोमा उनले चिन्ता व्यक्त गरिन् । उनको जस्तै समस्या भोग्ने नारायणगढमा धेरै देखिन्छन् ।

त्यस्तै अर्काे चिन्ता व्यक्त गर्नेमा नारायणगढको शहिदचोकमा रहेको भेटघाट रेष्टुरेन्टका सञ्चालक गोविन्दप्रसाद तिवारी पनि छन् । उनले महानगरपालिकाले थोरै खर्च गरेर समस्या समाधान गर्न सक्ने काममा पनि चासो नदिएको नारायणी अनलाइनलाई गुनासो गरे । उनले भने, ‘पानीको निकास हुने चेम्बरमा राखिएको जालीलाई बलियोसँग राख्न नसक्दा यो समस्या आएको हो । कवाडीवालाले जाली सबै तानेर लगे तर जालीलाई व्यवस्थित ढंगले राख्न नसक्दा ढल सबै जाम भयो ।’ व्यवसायी तिवारीले धेरै वर्ष अगाडिदेखि नारायणगढमा यो समस्या रहेको बताए । उनले भने, ‘मेरो रेष्टुरेन्ट अगाडि मैले नै सरसफाइ गर्छु । अरुले पनि चासो राख्नु पर्छ ।’

सामान्य वर्षासँगै आएको पानीले पुल्चोक क्षेत्रको सडक जलमग्न हुन्छ । पुल्चोक क्षेत्रको सडक किनारामा सवारीसाधन रोक्ने ठाउँमा ठूला ठूला खाडल छन् र त्यसमा पानी जमेका छन् । सडकभरी पानी हुँदा वारपार गर्ने यात्रुलाई समस्या हुने गरेको छ । वर्षाेदेखि नागरिकले भोग्दै आएको यो समस्याको निराकरण कहिले हुने हो अहिलेसम्म पनि अन्यौल नै छ । नागरिकले प्रत्यक्षरुपमा यो समस्याको गुनासो महानगरपालिका र वडा कार्यालयहरुमा गर्दै आएका छन् भने ती कार्यालयहरु समस्यालाई डिभिजन सडक कार्यालयतिर तेर्सार्ने गर्छन् । डिभिजन सडक कार्यालय भरतपुरका प्रमुख कृष्णराज अधिकारी नारायणगढ बजार क्षेत्र पूर्वपश्चिम महेन्द्र राजमार्गअन्तर्गत नै पर्ने भएकोले पनि यसको मर्मतसंहार गर्ने जिम्मेवारी डिभिजन सडक कार्यालयको नै हुने नारायणी अनलाइनलाई बताए । उनले भने, ‘ पुल्चोक–गोन्द्राङ सडक विस्तारको लागि अहिले टेण्डर भइरहेको छ । यो काम सकिएपछि अहिले देखिएको सडकको समस्या समाधान हुन्छ । ’ उनले सडक विस्तारको काम सकिन अझै २८ महिना लाग्ने पनि नारायणी अनलाइनलाई जानकारी दिए । धेरै वर्ष अगाडि बनेको सडक र ढलको समस्याले गर्दा पनि सडक किनारमा पानी जम्ने समस्या आएको उनको विचार थियो । अझै नागरिकले यो समस्याबाट मुक्ति पाउनको लागि साढे दुई वर्ष पर्खनुपर्ने भएको छ ।

त्यसैगरी नारायणगढ बजारमा देखिएको समस्याबारे महानगरपालिका वडा नम्बर १ का वडाअध्यक्ष जयराम श्रेष्ठले धेरै अगाडिदेखि यो समस्या देखिएको बताए । उनले भने, ‘पुरानो सडक र नालीको समस्याको कारणले सडकमा पानीको ताल बन्ने गरेको छ ।’ अध्यक्ष श्रेष्ठले अहिलेनै वडाले खर्च गयो भने पछि फेरि भत्काउन पर्ने हुनसक्ने भएकोले पनि सडक डिभिजनले सडक बिस्तार गरिसकेपछि समस्या समाधान हुने विचार राखे । उनले पुंगी खोलाको सतह बढ्दै गएको अवस्थामा पानीको राम्रो निकास नभएकोले बजारमा समस्या देखिएको बताए । जसको जिम्मेवारी भए पनि नागरिकले सडकमा सास्ती पाउनु भएन भन्ने सबैको विचार रहेको छ ।