खुमलटारमा ‘बादल’ लागेपछि बालुवाटारमा ‘बर्षा’, प्रचण्डले ‘कुर्सी’ पाए

काठमाडौं, २० वैशाख । सत्तारुढ नेकपाको बुधबार बसेको सचिवालय बैठकमा कार्यकारी अध्यक्ष प्रचण्डले सचिवालय बैठकमा कुर्सी व्यवस्थापनको कुरा उठाएका थिए । पार्टी एकतापछि पलपल अपमानित हुनु परेको भन्दै उनले अध्यक्ष ओलीको हाराहारीमा कुर्सीको व्यवस्थापन नभएको पनि गुनासो गरेका थिए ।

शनिबारको बैठकमा उनले ओलीको हाराहारीमा बस्न पाए, तदनुरुप नै कुर्सीको व्यवस्थापन भएको तस्बिर प्रधानमन्त्री कार्यालयले सार्वजनिक गरेको छ । तर प्रचण्ड अन्य सदस्यसँग बस्दा पनि शक्तिका हिसाबले कमजोर भएका छन् ।

लामो समयको रस्साकस्सीपछि ओलीले दाहाल-नेपाल-खनाल गठबन्धनबाट सदस्यहरु खोस्न सफल भएका छन् । अध्यादेश प्रकरणपछि पार्टी अध्यक्ष र प्रधानमन्त्री दुवै पदमा राजीनामा मागेको शक्तिशाली भैंसेपाटी गठबन्धनलाई ओलीले शनिबार अपराह्नसम्ममा भत्काएका हुन् । यसबीचमा उनले राति राति प्रधानन्यायाधीश र अख्तियार प्रमुखसम्म भेटे । संविधानका धाराहरु पल्टाए र विभिन्न कार्डहरु फ्याँके । अन्ततः उनले सचिवालय बहुमत हासिल गर्न सफल भएका छन् ।

यो अवस्थालाई ‘खुमलटारमा बादल लागेपछि बालुवाटारमा वर्षा’ भनेर सामाजिक सञ्जालमा बिम्ब प्रयोग गर्न थालिएको छ । पूर्वमाओवादी समूहका रामबहादुर थापा बादलले खुमलटार क्याम्प छाड्ने संकेत पाएपछि सत्ता शक्तिका कारण अन्य सदस्यहरुले पनि राम्रोसँग खुट्टा टेक्न सकेनन् ।

जसले गर्दा सचिवालयको आन्तरिक समीकरण रातारात बदलियो । वामदेव गौतम र गृहमन्त्री बादलले क्याम्प परिवर्तन गरेपछि विष्णु पौडेलले पनि ओलीकै पक्षमा अडान लिन थाले ।

सचिवालयमा बलियो भएपछि प्रधानमन्त्रीको तत्कालको सत्ता संकट टरेको छ । उनले अब प्रधानमन्त्री र अध्यक्ष दुवै पद छाड्ने छैनन् । शनिबार दिनभरीमा भएका अन्य सहमतिहरुबारे स्पष्ट सूचनाहरु भने सार्वजनिक भइसकेका छैनन् ।@सोमवार