रि-ईन्ट्रि भिषाले नेपालबाट सिधा प्रवेश पाउने, यो नियमले विद्यार्थीपनि आशाबादी ! (जापान प्रवेश पूर्व र प्रवेशपछि अपनाउनुपर्ने नियम सहित)

टोकियो, कोभिड संक्रमणका कारण जापान सरकारले नेपाल लगायत बिभिन्न देशका नागारिकलाई जापान प्रवेशमा लगाएको यात्रा प्रतिबन्ध खुलेको छ । रि-ईन्ट्रि भिषा भएकाहरुले सेप्टेम्बर २० आईतबारबाट नेपालबाट सिधा प्रवेश पाउनेछन्। जापानले लगाएको यात्रा प्रतिवन्धका कारण घरविदामा गएर नेपालमै रोकिएका जापानवासी नेपालीहरु जापान आउन पाउने भएका छन् ।

शुक्रबार जापान सरकार, परराष्ट्र मन्त्रालयले जारी गरेको सूचना अनुसार, कोभिड १९ संक्रमण नियन्त्रणका लागि जापान सरकारले नेपाल लगायत दक्षिण एसियाली देशहरु भारत, अफगानिस्तान, बंगलादेश, श्रीलंका र माल्दिभ्समा लगाईएको यात्रा प्रतिबन्ध यहि सेप्टेम्बर १९ तारिखबाट हटाउने सूचना जारी भएपछि नेपाल लगायतका देशहरुमा महिनौँ रोक्किनु परेका हजारौँ नेपालीहरुलाई राहत हुने भएको हो ।

जापान सरकारले जारी गरेको सूचना अनुसार तिन दिन होटल क्वारेनटाईन पछि यात्रु निजि वहान प्रयोगगरी आफ्नो घर जान सक्ने छन । घरमा १४ दिनको घर क्वारेनटाईनलाई कडासग नियमन गरिनेछ भने यदि नियमहरु पालन नभए भिषा रद्द गर्न समेत सकिने जनाईएको छ ।

भिषा भएर पनि कोभिड १९ का कारण नेपालमा नै रोकिएका नेपालीहरुका लागि प्रवेश खुल्ला हुने व्यहोरा उल्लेख भएता पनि, नयाँ भिसा वाहकहरुको लागि यस पटकको सूचनामा पनि केहि उल्लेख गरिएको छैन । करिव २ बर्ष अघिदेखि अध्ययनका लागि जापान आउन चाहने हजारौं विद्यार्थीहरु जापान सरकारले लगाएको यात्रा प्रतिवन्धका कारण रोकिएका छन् । रि-ईन्ट्रि भिषा भएकाहरुले सेप्टेम्बर २० आईतबारबाट नेपालबाट सिधा प्रवेश पाउने समाचार आयपछी २ बर्ष अघिदेखि अध्ययनका लागि जापान सरकारले लगाएको यात्रा प्रतिवन्धका कारण रोकिएका हजारौं विद्यार्थीहरु यो समाचार सगै केहि राहत महसुस गर्नुको साथ साथै अब नया बिद्यार्थी हरुको लागि पनि जापान जानको लागि लगाएको यात्रा प्रतिवन्ध छिटो भन्दा छिटो हट्छ कि भन्ने आशाबादी रहेको बताउछन् ।

जापान प्रवेश पूर्व र प्रवेशपछि अपनाउनुपर्ने नियमहरु यस्तो छ

जापानको रि-इन्ट्रि भिषा खुले सँगै जापानको रोजगार, डिपेण्डेन्ट, बिजनेस, विद्यार्थी लगायत सबै रि-ईन्ट्रि भिषा भएकाहरुले सेप्टेम्बर २० आईतबारबाट नेपालबाट सिधा प्रवेश पाउनेछन् ।
१. जापान प्रवेश गर्नुपूर्व ७२ घण्टा भित्रको कोरोना भाइरस संक्रमण परीक्षणको नकारात्मक रिपोर्ट चाहिने छ ।

२. जापान प्रवेश पूर्व यात्रीहरुले अनिवार्य रुपमा तीनवटा मोबाईल एप्लिकेसन आफ्नो स्मार्टफोनमा डाउनलोड गरेर राख्नुपर्नेछ । यसको अर्थ हरेक यात्रीको साथमा स्मार्टफोन हुनु आवश्यक छ । ती एप्लिकेसनहरुमा कन्ट्याक्ट ट्रेसिगं एप कोकोआ, सरकारकै ओस्सामा लोकेशन कन्फर्मेशन एप र स्काइप रहेको छ । यदि यात्रीले साथमा स्मार्टफोन नबोकेमा बिमानस्थलबाट दुई साताको लागि भाडामा स्मार्टफोन लिनुपर्नेछ । त्यसको रकम बिमानस्थलले तोकेको नियमानुसार हुनेछ ।

३. जापान आईपुगेपछि बिमानस्थलमा कोभिड १९ परीक्षण हुनेछ । यदि कोरोना सकारात्मक पाइएमा उपचारको लागि तोकिएको स्थानमा बस्नुपर्नेछ । नकारात्मक देखिएमा तीन दिन तोकिएको होटलमा बस्नुपर्नेछ । हालसम्म होटलमा बस्दाको खर्च जापान सरकारलेनै व्यहोर्दै आएको छ ।

४. चौथो दिनमा होटल क्विरिन्टिनबाट घर प्रवेश गर्नुअघिनै कोरोनाको पीसीआर परीक्षण हुनेछ । नकारात्मक आएमा घर जान पाइनेछ भने सकारात्मक देखिएमा पुन थप आवश्यक दिन उपचारार्थ बस्नुपर्नेछ । यसअघिको नियमानुसार ६ दिन होटल क्वारिन्टिन बस्नुपर्ने नियम रहेको थियो ।

५. चौथो दिन होटलबाट घर जाँदा निजि गाडीको प्रयोग आफैंले व्यवस्थापन गर्नुपर्नेछ । निजि सवारी बाहेक सार्वजनिक बस, रेल वा ट्याक्सि प्रयोग गर्न पाईंदैन । निजि गाडीको व्यवस्थापन गरेर जान नसकेमा होटलमानै थप ११ दिन बस्नुपर्नेछ । तर ११ दिन बस्दाको खर्च भने होटलले तोके अनुसार आफैंले तिर्नुपर्नेछ ।

६. होटलबाट घर जानुअघि जापान ईमिग्रेसन कोभिड नियन्त्रण उपाय सबै पालना गर्छु भन्ने लिखित कागज गर्नुपर्नेछ । जसमा सबै कुरा पालना गर्छु नगरेमा तोकिएको कानुनी दण्ड सजाय भोग्छु भन्ने उल्लेख हुन्छ । सम्झौताको नियम उल्लंघन गरेमा नेपाल फिर्ता पठाउनसक्ने सम्मको कानुनी अधिकार रहेको छ ।