प्रस्तावित रेलमार्गको सर्भे भएकै छैन, गाडी आगजनीप्रति गरिँदै गहिरो अनुसन्धान-चितवन प्रशासन

भरतपुर : जिल्ला प्रशासन कार्यालय चितवनले जिल्लामा प्रस्तावित रेलमार्ग सर्भे नभएको जनाएको छ । प्रमुख जिल्ला अधिकारी इन्द्रदेव यादवले विगत केही समययता जिल्लामा प्रस्तावित रेलमार्गको कुनै सर्भे नभएको जानकारी दिए ।

प्रस्तावित रेलमार्गको सर्भे गर्न आएको भन्दै तीन दिनअगाडि भरतपुर–७ मा एउटा कम्पनीको गाडी आगजनी भएको थियो । सो गाडी र त्यसमा चढेका कर्मचारी कुनै कम्पनीको भएको र तिनीहरुले प्रस्तावित रेलमार्गको सर्भे नगरेको चितवन प्रशासनको भनाइ छ ।

‘आगजनी भएको गाडी र यसमा चढेर आएका कर्मचारी गुगल म्याप सर्भेका लागि आएको बुझियो’, प्रमुख जिल्ला अधिकारी यादवले भने, ‘जुन उद्देश्यले आएको भनियो, वास्तवमा त्यो रहेनछ ।’

आगजनी भएको गाडी बागमती प्रदेशको आरएच कन्सल्टेन्सीको ०१, ०३० च ७१९० नम्बरको हो । यो गाडी हाल जिल्ला प्रहरी कार्यालय चितवनमा छ । प्रहरी कार्यालय चितवनका प्रहरी नायब उपरीक्षक तथा सूचना अधिकारी भेषराज रिजालले जलेर बाँकी रहेको गाडीलाई नियन्त्रणमा लिएर अनुसन्धान गरिएको बताए ।

उनले भने, ‘गाडी, त्यसमा सवार कर्मचारी र रेलमार्गबीच कुनै साइनो रहेनछ, जुन रेलमार्ग सर्भे भनियो त्यो गाडी यस प्रयोजनका लागि आएकै होइन, बुझाइमा फरक परेको छ ।’ चाँडै आक्रोशित हुँदा र गलत बुझाइका कारण घटना घटेको उनले बताए ।

हालसम्म आगजनीको जिम्मा कसैले लिएको छैन । प्रस्तावित रेलमार्ग पीडित संघर्ष समितिले अज्ञात समूहबाट आगजनी भएको बताएको छ । समितिका अध्यक्ष भगीरथ पहारीले गाडीलाई नियन्त्रणमा लिएर प्रहरी बिटमा लैजाने क्रममा भीडभाडमा भएको अज्ञात समूहको घुसपैठबाट आगजनी भएको बताए ।

पीडित संघर्ष समितिका सचिव दिव्यबाबु नेपालले समितिले आगजनीको जिम्मा नलिने बताए । उनले भने, ‘आगजनीप्रति दुःख प्रकट गरेका छौँ, कसले आगजनी गरेको हो थाहा नै छैन । हामीले त गाडी र त्यसमा सवार कर्मचारीलाई प्रहरीको जिम्मा लगाएका थियौँ, आगजनी त पछि भएको छ ।’

उनका अनुसार आगजनी भएको गाडी र त्यसमा सवार कर्मचारी जहाँ प्रस्तावित रेलमार्ग छ त्यहीँ क्यामराले सर्भे गर्दै हिँडेपछि स्थानीयमा रेलमार्गकै सर्भे भएको बुझाइ प¥यो । उनले गाडी रेलमार्गको सर्भेका लागि दौडिएको हो या अरु प्रयोजनका लागि दौडिएको हो, आफूलाई अहिलेसम्म थाहा नभएको बताए ।

चितवन प्रहरीले गाडी आगजनीप्रति गहिरो अनुसन्धान भइरहेको जनाएको छ । प्रहरी कार्यालय चितवनका सूचना अधिकारी रिजालले घटनाको अनुसन्धान भइरहेको बताए । उनले भने, ‘आगजनी गर्नेहरुको पहिचान गर्ने क्रममा छौँ, चाँडै पक्राउ गरी नियन्त्रणमा लिने प्रयासमा लागिरहेका छौँ ।’

समितिका सचिव नेपालले घना बस्तीबाट रेलमार्ग नलैजाने र यसको विकल्प खोज्न सम्बन्धित निकायलाई आग्रह गरिरहँदा पनि सो क्षेत्रमा सर्भेका गतिविधि भइरहेको हुनाले शङ्का उब्जिरहेको बताए । उनले भने, ‘नयाँ सरकार बनेको छ, हामी सरकारको ध्यानाकर्षण गराउन र प्रस्तावित मार्गको विकल्प खोज्न अनुरोध गर्नेछौँ ।’

हालको प्रस्तावित पूर्वपश्चिम रेलमार्ग चितवनको राप्ती नगरपालिकाको १, २, ३ र ६, खैरहनी नगरपालिकाको ५, ७ र १०, रत्ननगर नगरपालिकाको ४, ५ र ९, त्यस्तै भरतपुरको ८, ७, ५, ४ र १६ नम्बर वडा हुँदै जाने गरी प्रस्तावित गरिएको छ । सो मार्गमा भरतपुर महानगरपालिकामा उल्लेखित अधिकांश वडाहरु सहरी क्षेत्रमा पर्दछन् । प्रस्तावित रेलमार्ग घना बस्तीमा पर्ने भएकाले यसको विकल्प खोज्न स्थानीयले माग गर्दै आइरहेका छन् ।