विश्वप्रकाश शर्माको महामन्त्री उमेदवारी। देउवा प्यानल कि ! निधि प्यानल ?

भदौ काठमाडौं। नेपाली कांग्रेसका प्रवक्ता विश्वप्रकाश शर्माले महामन्त्रीमा उमेदवारी घोषणा गरेको भोलिपल्ट उपसभापति निधिको निवासमा देखिएका छन् । सभापतिमा उमेदवारी घोषणा गरेर छुट्टै सम्पर्क कार्यालयसमेत खोलेर अभियान चलाइरहेका निधि निवासमा गणेशको जन्मदिन अर्थात गणेश चौथीको अवसरमा भएको पूजामा शर्मा देखिए । मिथिला क्षेत्रको लोकप्रिय पर्व चौरचन पूजामा कांग्रेसका अन्य कुनै नेता नहुनु र विश्वप्रकाश शर्मा पुग्नुलाई धार्मिकभन्दा राजनीतिक अर्थमा बुझिएको छ ।

बिमलेन्द्र निधि लामो समयदेखि देउवा टिममा रहेर राजनीति गरेका नेता हुन् । ०५२ सालमा गिरिजाप्रसाद कोइरालाविरुद्ध चिरञ्जीवि वाग्लेलाई सभापति उमेदवार बनाउँदादेखि नै कोइराला प्यानलबाहिर राजनीति गरेका निधि कांग्रेस नेता कृष्णप्रसाद भट्टराई (किशुनजी)को निकटस्थ भएर राजनीति गरेका नेता हुन् । त्यो टिममा शेरबहादुर देउवा भने करिव ८ वर्षपछि मात्र पुगेका हुन् । त्यति लामो समय देउवा टिममा राजनीति गरेका निधि अहिले भने ‘देउवा होइन म हो अवको सभापति’ भन्दै सम्पर्क कार्यालय खोलेर अभियान चलाइरहेका छन् । देउवाले ‘एक पटकका लागि मात्र कांग्रेसको सभापति बन्ने’ ‘जेन्टलमेन एग्रिमेन्ट’ उल्लंघन गरेपछि छुट्टै टिम बनाउनु परेको भन्दै सभापतिमा उमेदवारीको गृहकार्यमा जुटेका निधिसँग विश्वप्रकाशको उपस्थिति आफैंमा अर्थपूर्ण छ ।

त्यसैले उमेदवारी घोषणाको भोलिपल्ट तपाईं निधि निवासमा देखिनुको राजनीतिक अर्थ के हो ? भन्ने बाह्रखरीको प्रश्नमा शर्मा भने त्यसको राजनीतिक अर्थ खोजिनु नै बेठिक भएको बताउँछन् ।

“त्यो राजनीतिक भेटघाट होइन । धर्मिक आध्यात्मिक हो,” शर्माले भने, “पूजाको निम्तो मान्न पनि लुकेर जानु ?” पूजाको निम्तो मान्न लुकेर त जानु परेन तर राजनीतिमा समयको पनि अर्थ त हुन्छ । देउवा प्यानलका दुबै नेताले एक्ला–एक्लै उमेदवारी घोषणा गर्नु अनि एकसाथ देखिनुको अर्थ त हुन्छ नि !

“मेरो उमेदवारी घोषणा र त्यसलगत्तैको उहाँकै निवासमा पुगेको फोटो, त्यसको राजनीतिक अर्थ लाग्छ भन्ने मलाई पनि थाहा थियो,” शर्माले भने, “तर, एउटा नेताले आज मेरो घरमा पूजा छ, तपाईं कता हुनुहुन्छ भने पछि म काठमाडौंमै छु, आइपुग्छु भनेर त्यहाँ पुगेको हुँ । पुग्दा पूजा हुँदैरहेछ, म पनि पूजामा सहभागी भएँ । फोटो खिचियो, विमल दाइ र भाउजुले फोटो सामाजिक संजालमा सेयर गर्दा तपाईंलाई अप्ठेरो त पर्दैन नि भनेपछि मैले पर्दैन भनेको हुँ ।”

Global bank
“भोलि शेखर कोइरालाले मेरो घरमा आज आऊ भन्नुहोला, मैले फोटो नखिच्ने र सार्वजनिक नगर्ने सर्तमा है भन्नु ?,” प्रतिप्रश्न गर्दै शर्माले भने, “म कांग्रेसको महामन्त्रीको उमेदवार हुँ ।”

प्यानल त चाहिन्छ होला नि ? प्रश्नमा शर्माको जवाफ थियो, “महामन्त्रीले प्यानल बनाउने त होइन नि !”

उनले प्रवक्ताबाट रिटायर्ड हुन आएको होइन भन्दै उनले आफूले पवित्र ठाउँमा गएर उमेदवारी घोषणा गरेको बताए ।

“बीपीलाई आठ वर्षसम्म जेल राखिएको, बीपीसँगै गणेशमान, किशुनजी, रामनारायण मिश्रसहित जेल बसेको ठाउँमा, बीपीले रोपेको कपुरमा सिंचन गरेर, त्यहीँ नजिक रुद्राक्षको विरुवा रोपेर उमेदवारी घोषणा गरेको छु,” शर्माले भने, “अब देशभरका साथिहरुसँग आफ्नो उमेदवारी लिएर जाने बाटो बनाएको हुँ ।”@ १२ खरी