निर्दोष दुई सैनिकले सफाइ पाय सगै चितवन कारागारले सेनाको जिम्मा लगायो।

भदौ चितवन। भरतपुर, नेपाली सेनाको एसएमजी हतियार चोरीको आरोपमा पक्राउ परेका दुई सैनिकले २८ महिनाको जेलजीवन काटेपछि सफाइ पाएका छन् ।

नेपाली सेनाका अमल्दार लवकुमार गुरुङ र सिपाही सरोज तामाङलाई आज शुक्रबार साँझ भरतपुर कारागारले छाडेको हो । गुरुङ र तामाङलाई नेपाली सेनाको चितवनस्थित कालिबहादुर गणमा सेनाहरुले लगेका छन् ।

एसएमजी चोरी घटनामा दोषी नदेखिएपछि उनीहरुलाई सैनिक विशेष अदालतले रिहा गरेको हो । सैनिक विशेष अदालतको आदेशअनुसार रिहा गरिएको चितवन जिल्ला कारागारले जनाएको छ । भरतपुुर कारागारका प्रमुख कमलप्रसाद काफ्लले सैनिक विशेष अदालतको आदेशअनुसार गुरुङ र तामाङलाई सेनाको जिम्मा लगाएर पठाएको जानकारी दिए ।
उनले भने, ‘आदेश आउनसाथ शुक्रबार साँझ ५ बजेतिर दुबै सैनिकलाई रिहा गरिएको हो ।’

सैनिकद्वय तामाङ र गुरुङले चोरी गरेको भनिएको एसएजीको प्रयोग गरी गंगाधर ढकालले आफ्नै साथी सैनिक भरत गुरुङको हत्या गरेपछि उनीहरु निर्दोष भएको दावी गर्दै सैनिक विशेष अदालतको पाटन उच्च अदालतमा बहस चलेको थियो ।

सैनिक गुरुङको हत्या गरेको स्वीकार गरेका ढकाललाई सैनिक समरी जनरल अदालतले जन्मकैदको फैसला सुनाइसकेको छ ।