निजी व्यवसाय बाट सर्ने, सरकारी कार्यालयको भिडभाड बाट नसर्ने हो कोरोना?

साउन भरतपुर। चितवनमा कोरोना सङ्क्रमितको संख्या दिनहुँ बढिरहँदा पनि स्वास्थ्य मापदण्डको पालना भने पर्याप्त भएको छैन । सङ्क्रमितको संख्या बढ्दै गएपछि जिल्ला प्रशासन कार्यालय चितवनले निषेधाज्ञा थप्दै अझ कडाइ गरेको छ, तर पनि पालना भने हुन सकेको छैन ।

कोरोना सङ्क्रमितको संख्या बढ्न थालेपछि चितवन प्रशासनले विभिन्न व्यवसायहरुलाई सञ्चालनका लागि निश्चित समय दिएको छ तर सरकारी कार्यालयहरुमा लागेको भीडमा भने चितवन प्रशासनको आँखा पुगेको छैन। चितवनका निजी क्षेत्रका पसलहरुको भीडभाड देख्न सक्ने प्रशासनले मालपोत कार्यालयको भीडभाड पनि देख्न सुझाव दिएका छन् ।

‘सङ्क्रमण बढ्दै गयो भनेर सर्बसाधरण ले गुजारा चलाउन गर्ने व्यवसाय सञ्चालनलाई निश्चित समय दिइयो, तर अत्यधिक भीडभाड हुने मालपोत, कर कार्यालयमा ठेलमठेल भीडभाड त देखियो’। जहाँ भीडभाड नियन्त्रण हुनुपर्ने, जहाँ स्वास्थ्य मापदण्डको पालना बढी हुनुपर्ने त्यो ठाउँमा हुन सकेको छैन ।

‘घरमा बस्नेले खोप पाएका छन्, बाहिर डुलिरहने मान्छेले खोप पाएनन्, यो पनि अमिल्दो भएको छ ।’

पछिल्लो समय चितवनमा निषेधाज्ञामा कडाइ गरिएको छ । ३२ गते राति १२ बजेसम्म जारी गरिएको निषेधाज्ञामा ठेला तथा फुटपाथ पसल, सपिङ मल, स्ट्रीट फ्रुट पसल, सैलुन, ब्युटी पार्लर सञ्चालनमा रोक लगाइएको छ । खाद्यान्न, तरकारी, फलफूल, डेरी, पोल्ट्रीजन्य पसल, एग्रोभेट, रासायनिक मल, पूजा सामग्री पसल दैनिक बिहान १० बजेसम्ममात्रै सञ्चालन गर्न पाइनेछ । दूध डेरी बेलुका ५ बजेदेखि ७ बजेसम्म सञ्चालन गर्न पाइनेछ ।

यस्तै इलेक्ट्रिक, भाँडा पसल, कपडा पसल, कस्मेटिक पसल, स्टेसनरी, टेलरिङ, सुनचाँदी पसल, मोटर पार्ट्स, अटोमोबाइल, निर्माण सामग्रीलगायतका व्यापारिक पसलहरु आइतबार, मंगलबार र बिहीबार दिउँसो १२ बजेदेखि ६ बजेसम्ममात्रै सञ्चालन गर्न पाइनेछ । खाजाघर, रेस्टुरेन्ट तथा मिठाई पसलहरु दिउँसो १२ बजेदेखि बेलुका ६ बजेसम्ममात्रै सञ्चालन गर्न पाइनेछ । चितवन प्रशासनले लगाएको यस्तो नियम पनि पूर्णरुपमा पालना हुन सकेको छैन ।