चितवनमा कोरोना बढ्दै : मुक्त हुनेको तुलनामा नयाँ संक्रमितको संख्या दोब्बर

साउन, चितवन। चितवनमा कोरोना भाइरस संक्रमणको जोखिम अझै कम हुन भने सकेको छैन। चितवनको बुधबारको तथ्यांक हेर्ने हो भने संक्रमणमुक्त हुने संख्याको तुलनामा नयाँ संक्रमितको संख्या झण्डै दोब्बरले बढी रहेको छ। बुधबारको तथ्यांकअनुसार १०० जना संक्रमणमुक्त हुँदा १९३ जना नयाँ संक्रमित थपिएका छन्। निषेधाज्ञा पूर्णरुपमा नखुले पनि बजारलाई केही सहज बनाएकोले संक्रमितको संख्या शून्यमा झार्न सकिएको छैन।
जिल्लामा अझै पनि एक हजार ७३९ जना सक्रिय संक्रमित रहेको जिल्ला स्वास्थ्य कार्यालयको तथ्यांकमा उल्लेख छ। तीमध्ये १२६ जना अस्पतालको आइसोलेसन केन्द्रमा रहेका छन् भने एक हजार ६०३ जना होम आइसोलेसनमा र बाँकी १० जना स्थानीय तहको आइसोलेसन केन्द्रमा स्वास्थ्य सेबा लिरहेका छन् ।
जिल्लाको कूल तथ्यांकमा ३१७ जना संक्रमितले ज्यान गुमाइसकेका छन्। बुधबार पनि दुई जनाको मृत्यु भएसगै मृत्यु हुनेको संख्या ३१७ पुगेको हो। चितवन मेडिकल कलेज र भरतपुर अस्पतालमा एक/एक जनाको मृत्यु भएको स्वास्थ्य कार्यालय चितवनले जनाएको छ। जिल्लामा कूल संक्रमितको संख्या भने १८ हजार ८०२ पुगेको छ। तीमध्ये १६ हजार ७४८ जना मात्रै संक्रमणमुक्त भएका छन्।

अस्पतालमा उपचाररत २०२ जना
चितवनका अस्पतालमा अझै पनि २०२ जना कोरोना संक्रमितको उपचार भइरहेको छ। तीमध्ये १२ जना भेन्टिलेटरमा, ६४ जना आइसियूमा र ४२ जना एचडियूमा छन्। सबैभन्दा धेरै संक्रमितको भरतपुर अस्पतालमा उपचार भइरहेको छ। भरतपुर अस्पताल भर्ना भएका संक्रमितमध्ये दुई जना भेन्टिलेटरमा छन् भने १९ जना आइसियूमा छन्।
यस्तै चितवन मेडिकल कलेजमा सात जना भेन्टिलेटरमा र ३५ जना आइसियूमा सहित ५६ जना उपचाररत छन्। कलेज अफ मेडिकल साइन्सेस शिक्षण अस्पतालमा भने तीन जना भेन्टिलेटरमा र १० जना आइसियूमा छन्। बाँकी केही अन्य निजी अस्पताल र स्थानीय तहको आइसोलेसन केन्द्रहरुमा उपचाररत छन्।

३२ जना डिस्चार्ज
चितवनका अस्पतालबाट बुधबारसम्मको पछिल्लो २४ घण्टामा ३२ जना कोरोना संक्रमित घर फर्किएका छन्। भरतपुर अस्वतालबाट १८, चितवन मेडिकल कलेजबाट ६, विपी कोइराला मेमोरियल क्यान्सर अस्पताल र खैरहनी नगरपालिकाको आइसोलेसन केन्द्रबाट चार/चार जना संक्रमित निको भएर घर फर्किएका हुन्।
सोही अवधिमा चितवनमा चितवनका दुईसहित तीनजना कोरोना संक्रमितको मृत्यु भएको छ। चितवन मेडिकल कलेजमा चितवनका एक जना र भरतपुर अस्पतालमा चितवन र मकवानपुरका एक/एक जना कोरोना संक्रमितको मृत्यु भएको स्वास्थ्य कार्यालय चितवनले जनाएको छ।