चितवनमा सवारी दुर्घटना भयाबह बन्दै : आठ महिनामा मृत्युहुने ७९ पुग्यो।

चैत, चितवन। चितवनमा चालू आर्थिक वर्ष ०७७/७८ को आठ महिनामा सवारी दुर्घटनाबाट ७९ जनाको मृत्यु भएको छ भने २२९ जना गम्भीर घाइते भएका छन् । मृत्यु हुनेहरुमा पुरूष ६४ जना, महिला ११ जना, बालक एक जना र बालिका तीन जना रहेका छन् ।

गत आर्थिक वर्ष ०७६/७७ को आठ महिनामा जिल्ला सवारी दुर्घटनाबाट ९३ जनाको मृत्यु भएको थियो । अघिल्लो आव ०७५/७६ को आठ महिनामा दुर्घटनाबाट ११० जनाको मृत्यु भएको थियो । ट्राफिक प्रहरीको तथ्याङ्कअनुसार पछिल्ला वर्षहरुमा दुर्घटनाको दर बढेपछि मृत्युदर भने कम भएको छ ।

पछिल्ला वर्षहरुमा जिल्लामा दुर्घटना बढेको जस्तो देखिए पनि मृत्युदर भने घटेको छ’, उनले भने, जति दुर्घटना भएका छन् त्यसमा प्रमुख कारण तीव्र गति देखिएको छ । तीव्र गतिमा सवारी चलाउँदा धेरै दुर्घटना भएका छन् ।

चालू आवको फागुन मसान्तसम्ममा २९७ वटा दुर्घटना भएको जिल्ला ट्राफिक प्रहरी कार्यालय चितवनका प्रमुख प्रहरी निरीक्षक दयाकृष्ण भट्टले जानकारी दिए । गत आवको यस अवधिमा २११ वटा र अघिल्लो आवको यस अवधिमा २०६ वटा दुर्घटना भएका थिए ।

चालू आवमा भएका दुर्घटनामध्ये ६३ प्रतिशत अर्थात् १९० वटा दुर्घटना सवारीसाधनको तीव्र गतिका कारण भएका हुन् । त्यसपछि चालकको लापर्बाहीले गर्दा ७४ वटा, मादक पदार्थ सेवन गरेर सवारीसाधन चलाउँदा १५ वटा, ओभरटेक गरेर चलाउँदा १२ वटा, यात्रुको गल्तीका कारण ४ वटा र सडकको दुरवस्थाका कारण ३ वटा दुर्घटना भएको भट्टले बताए ।