नेपालकै पहिलो तौलपुल स्टेसन चितवनमा स्थापना

माघ , चितवन ।  सवारीसाधनहरुको भार मापन गर्न भरतपुर–१ स्थित आँपटारीमा तौलपुल स्टेसन स्थापना गरिएको छ । सरकारी लगानीमा स्थापना भएको नेपालकै पहिलो तौलपुल स्टेसनको आइतबार भौतिक पूर्वाधार तथा यातायातमन्त्री वसन्त नेम्वाङले उद्घाटन गरेका छन् ।

८० टन क्षमताको १८ मिटर लामो तौलपुल स्टेसनमा भार क्षमता मापन गर्न इलेक्ट्रो–मेकानिकल कन्ट्रोल रूमको व्यवस्था गरिएको छ । कुल एक करोड २१ लाख ७३ हजार ६६५ रूपैयाँ लागतमा स्थापना गरिएको तौलपुल स्टेसनको सञ्चालन ट्राफिक प्रहरीले गर्नेछ । भार मापन र प्राविधिक जनशक्तिको व्यवस्थापन यातायात व्यवस्था विभागले गर्नेछ ।

तौलपुल स्टेसनको उद्घाटनपछि बोल्दै यातायातमन्त्री नेम्वाङले नवनिर्मित सडकहरुलाई लामो समयसम्म टिकाउन तौलपुलको भूमिका रहने बताए । आवश्यकताभन्दा बढी लोड लिएर सडकमा गुड्ने सवारीसाधनका कारण सडकहरु छिट्टै जीर्ण हुने गरेको उनको भनाइ छ । ‘यसले ढुवानीको क्षेत्रलाई व्यवस्थित गर्नेछ’, उनले भने, ‘अन्य राजमार्गहरुमा पनि तौलपुल राख्ने कामको थालनी भएको छ ।’

मालवाहक सवारीसाधनले प्रतिएक्सल १०.२ टनभन्दा बढी वजन लिई चलाउन नपाउने कानुनी व्यवस्था छ । दुई एक्सल (चार पाङ्ग्रा भएको सवारीसाधन)को अगाडिको दुई पाङ्ग्राको एक्सल भार बढीमा ६ टन हुनुपर्ने व्यवस्था छ ।

नेपालमा मालवाहक सवारीको अत्यधिक भारका कारणले सडक पेभमेन्ट अपेक्षित अवधिभन्दा अगाडि नै जीर्ण हुने गरेको छ । यातायात व्यवस्था विभागको अध्ययनअनुसार अन्य कारणले भन्दा सवारीको बढी भारका कारण सडक छिटो जीर्ण हुने गरेको छ ।

विभागले सन् २०१६ मा धार्के, हेटौँडा र गैँडाकोटमा गरेको सर्वेअनुसार ७५ प्रतिशतभन्दा बढी ट्रकहरुले तोकिएकोभन्दा बढी वजन बोकेको पाइएको छ । ‘धेरैजसो मालवाहक सवारीहरु तोकिएको भार क्षमताभन्दा बढी वजन बोकेर चलाउने गरिएको पाइन्छ’, विभागका महानिर्देशक इन्जिनियर गोगनबहादुर हमालले बताए ।

उनका अनुसार ट्रकले तोकेकोभन्दा एक टन लोड बढी बोकेमा त्यसले सडकमा प्रतिकिलोमिटरमा ९७ रूपैयाँ क्षति गर्छ । बढी भार बोक्ने सवारीसाधनलाई बढी परिमाणको लोड निकालेर सम्बन्धित सवारी चालकलाई जरिवानासमेत गरिने उनले बताए । सवारीको भार क्षमतालाई नियन्त्रण गर्न सरकारले मालवाहक सवारीसाधनको भारवहन नियमनसम्बन्धी निर्देशिका, २०७४ जारी गरेको छ ।