आज ४० हजार नाघ्यो नेपालमा कुल संक्रमितको संख्या, कुन कुन जिल्लामा पुगे पाँच सयभन्दा बढी संक्रमित

भदौ, काठमाडौँ । पछिल्लो २४ घन्टामा नेपालमा थप १०६९ जनामा कोरोना भाइरसको संक्रमण देखिएको छ। २४ घन्टामा देशका विभिन्न प्रयोगशालामा गरिएको परीक्षणका क्रममा यी व्यक्तिमा कोरोना भाइरसको संक्रमण पोजेटिभ देखिएको स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले जानकारी दिएका हुन्। यो सहित नेपालमा कोरोना संक्रमित हुनेको संख्या ४० हजार ५२९ जना पुगेको छ। मंगलबार काठमाडौंमा ३९३, ललितपुरमा ५८ र भक्तपुर मा ३० संक्रमित थपिएका छन्। देशभर ७२८० जना होम आइसोलेसनमा रहेको मन्त्रालयले जनाएको छ।पछिल्लो २४ घन्टामा थप ७६८ जना कोरोना संक्रमणमुक्त भएका छन्। योसहित नेपालमा हालसम्म २२ हजार १७८ उपचारपछि निको भएका छन्।

काठमाडाैँ उपत्यका लगायत तराईका जिल्लामा कोरोनाको कहर बढ्दै गएको छ। हालसम्म पाँच सयभन्दा बढी कोरोना संक्रमित रहेका जिल्लाको संख्या १२ वटा रहेको स्वास्थ्य मन्त्रालयले जनाएको छ।

स्वास्थ्य तथा जनसंख्या मन्त्रालयको नियमित प्रेस व्रिफ्रिङका क्रममा मन्त्रालयका प्रवक्ता डा. जागेश्वर गाैतमले मोरङ, सुनसरी, धनुषा, पर्सा, बारा, महोत्तरी, रौतहट, सर्लाही, काठमाडौँ, ललितपुर, चितवन र रुपन्देहीमा पाँच सयभन्दा बढी सक्रिय संक्रमित रहेको जानकारी दिए।