चितवनमा निषेधआज्ञाको १५ दिनमै थपिय हाल सम्मको दोब्बरभन्दा बढी सङ्क्रमित

भदौ, भरतपुर । चितवनमा कोरोना सङ्क्रमितको संख्या दिन दुई गुना र रात चौगुना भनेजस्तै गरी बढ्दै गईरहेको छ। सङ्क्रमणको जोखिम रोक्न भनेर प्रशासन कार्यालयले जिल्लालाई समय थप गरेर निषेधाज्ञा जारी गरे पनि सङ्क्रमितको संख्यामा कमी आउनुको साटो तीव्ररुपमा वृद्धि हुँदै जानुले चितवनवासीमा थप त्रास सिर्जना हुनागयको छ ।
भदौ महिना लागेपछि को हालसम्मको तथ्याङ्क नै हेर्ने हो भने पनि पछिल्लो १५ दिनमा मात्रै चितवनमा ४९२ जनामा कोरोना सङ्क्रमण पुष्टि भएको छ । वैशाख ५ गते दुई जनामा सङ्क्रमण देखिएपछि सुरू भएको चितवन साउन ३२ गतेसम्ममा सङ्क्रमितको संख्या २०९ मात्र थियो । तर, गएको १५ दिनमा गएको पाँच महिनामा देखिएको सङ्क्रमितको संख्याको तुलनामा दोब्बरभन्दा बढीमा सङ्क्रमण पुष्टि भएको छ । सोमबार साँझसम्ममा सङ्क्रमितको संख्या ७०१ पुगेको स्वास्थ्य कार्यालय चितवनकी जनस्वास्थ्य अधिकृत गीताञ्जली ढकालले जानकारी दिइन् ।
भदौ लागेपछि सरदर दैनिक ५० जनाको हाराहारीमा सङ्क्रमण फैलिँदै गएको छ । यही १५ दिनको अवधिमा चितवन जिल्लामा पाँच जनाले कोरोना सङ्क्रमणकै कारण मृत्युवरण गरेका छन् । कोरोना सङ्क्रमणकै कारण कुल ६ जनाको मृत्यु भएको चितवनमा भदौ लागेपछिको १५ दिनमा मात्रै पाँच जनाले ज्यान गुमाएका छन् । उनका अनुसार कोरोना सङ्क्रमणकै कारण चितवनका अस्पतालमा उपचारकै क्रममा मृत्यु भएकाको संख्या भने १२ पुगेको छ । तीमध्ये चितवनका ६ जना, मकवानपुरका तीन जना, गोरखा, कैलाली र नवलपरासीका एक÷एक जना गरी १२ जनाले चितवनका अस्पतालमा उपचारकै क्रममा ज्यान गुमाएका हुन् । मृत्यु भएका १२ जनामध्येमा पनि १० जनाले यही १५ दिनको अवधिमा ज्यान गुमाएका छन् ।
चितवनमा हालसम्म सङ्क्रमितको संख्या ७०१ पुग्दा निको हुनेको संख्या भने जम्मा १४९ पुगेको छ । बाँकी ५४६ जना विभिन्न अस्पतालमा उपचाररत छन् । कोरोना सङ्क्रमणको जोखिममा भने सबैभन्दा बढी अस्पताल जाने र स्वास्थ्य उपचारमा संलग्न स्वास्थ्यकर्मी नै परेका छन् ।@ चितवन पोस्ट