निषेधाज्ञा को पहिलोदिन, सुनसान भरतपुर (फोटो सहित )

साउन, चितवन । भरतपुर महानगर क्षेत्रमा सुरक्षा निगरानी बढाइएको छ । जिल्ला प्रशासन कार्यालय चितवनले साउन ३० गते राती १२ बजेदेखि भदौ ५ गतेसम्म निषेधाज्ञा लगाएपछि सुरक्षाकर्मी परिचालन बढाइएको हो । सहायक प्रमुख जिल्ला अधिकारी नेत्रप्रसाद शर्माले महानगरमा सुरक्षा निगरानी बढाइएको बताउनुभयो ।

कोरोना संक्रमण समुदायस्तरमा फैलन सक्ने जोखिम देखेर निषेधाज्ञा लगाइएको हो, उहाँले भन्नुभयो, “जथाभावी हिडडुल र सवारीसाधनको प्रयोग नियन्त्रण गर्न सुरक्षाकर्मी परिचालन गरेका छौँ ।” स्थानीय प्रशासन ऐन २०२८ को दफा ६ को उपदफा ३ बमोजिम महानगरको सबै क्षेत्रमा निषेधाज्ञा लगाइएको हो । तीनै तहका नेपाल प्रहरी, नेपाली सेना र शसस्त्र प्रहरी चोक सडकमा उत्रिएका छन् ।

जिल्ला प्रहरी कार्यालय चितवनका प्रवक्ता प्रहरी नायव उपरीक्षक सूर्यबहादुर थापाले ३० ठाउँमा पिकेट र ८ वटा मोबाइल गस्ती गरिएको जानकारी दिनुभयो । “करिब ४ सय प्रहरी दैनिक परिचालन हुनेछन्”, उहाँले भन्नुभयो, “प्रहरी चौकी, इलाका प्रहरी कार्यालय मार्फत पनि नजिकका क्षेत्रमा निगरानी बढाइएको छ ।” भरतपुर, नारायणगढ, चनौली, रामनगर, जुगेडी लगायतका क्षेत्रमा निगरानी बढाइएको हो ।

जिल्ला ट्राफिक प्रहरी कार्यालय चितवनका प्रमुख प्रहरी निरीक्षक दयाकृष्ण भट्टले ३८ जना ट्राफिक परिचालन भएको बताउनुभयो । “पहिलो दिनमै १ हजार बढी चालकलाई सम्झाइ बुझाइ छाडेका छौँ”, उहाँले भन्नुभयो, “केही घण्टा होल्ड गरेर छाडेका छौँ, नारायणी पुलतिरबाट आउन खोज्नेलाई कडा निगरानी गरेका छौँ ।” ट्राफिक प्रहरीले गोन्द्राङ, आँपटारी, शहिदचोक, लायन्सचोक, वीरेन्द्र क्याम्पस, हाकिमचोक, आँपटारी, गीतानगर, चनौलीमा निगरानी बढाएको छ ।

मोटरसाइकल गस्ती समेत बढाएको बताउनुभयो । कालिबहादुर गणका प्रमुख सेनानी विज्ञान खनालले दैनिक ६ वटा पेट्रोलिङ टोली परिचालन गरिएको जानकारी दिनुभयो । “पिकेट टोलीलाई आवश्यक  सुरक्षाका लागि तयारी अवस्थामा छौँ”, उहाँले भन्नुभयो, “बजारको मुख्य क्षेत्रमा पेट्रोलिङ गस्ती पनि बढाएका छौँ ।”

शसस्त्र प्रहरी बलका करिब १ सय ५० जना परिचालन भएका छन् । शसस्त्र प्रहरी उपरीक्षक दिपककुमार थापाले ७ वटा पिकेट र २ वटा पेट्रोलिङ गस्तीका लागि परिचालन गरिएको बताउनुभयो । चोकचोकमा खटिन बनाइएको टोलीलाई पिकेट गस्ती भनिन्छ भने गाडीमार्फत गरिने निगरानीलाई पेट्रोलिङ गस्ती भनिन्छ ।

एक साताका लागि महानगर क्षेत्रमा निषेधाज्ञा गरिएपनि विहान ५ र बेलुका तीन तीन घण्टा  अत्यावश्यकीय खाद्य सामाग्री खरिद गर्न घरबाहिर निस्कन दिने छुट भएपनि निगरानी गर्न नछाडिने जनाइएको छ । सहायक प्रमुख जिल्ला अधिकारी शर्माले नजिकको पसलबाटै आवश्यक किनमेल गर्न सुझाउनुभयो । “दिनभरी रोकिएका यात्रु तथा सवारी गुड्न सो समय दिइएको होइन”, उहाँले भन्नुभयो, “सकेसम्म घरबाहिर ननिस्किनु, निस्कनै परे तोकिएको समयमा निजकको पसलबाटै किनमेल गर्नु, घुम्न ननिस्किनु ।”

दमकल, एम्बुलेन्स, ट्यांकर, स्वास्थ्यकर्मी, सुरक्षाकर्मी तथा सञ्चारकर्मीले प्रयोग गर्ने साधन र अत्यावश्यक कामका लागि अनुमति लिर्एरै मात्र सवारी चलाउन पाइने छ ।  उद्योग वाणिज्य संघ चितवनका अध्यक्ष राजु श्रेष्ठले निषेधाज्ञा पूर्णपालना गर्न आग्रह गर्नुभयो ।

अहिलेको संक्रमणको चेन तोड्न सकिए आगामी चाडबाडमा सहज रुपमा व्यापार व्यवसाय चलाउने स्थिति बन्न सक्छ उहाँले भन्नुभयो, अहिले महानगरका सबै व्यवसाय बन्द गरेर सहयोग गरौँ । संघले शुक्रबारनै विज्ञप्ति निकालेर एक हप्ता सबै व्यापार व्यवसाय बन्द गर्न अनुरोध गरेको थियो ।