सकियो मन्त्रिपरिषद् बैठक, कोरोना बढेको कारण लामो दूरीका यातायात, हवाई उडान, विद्यालय तथा परीक्षाजस्ता कार्य भदौ १५ सम्म स्थगित

साउन, काठमाडौं । सरकारले हवाई उडान तथा लामो दूरीका सार्वजनिक सवारी साधन भदौ १६ गतेसम्म बन्द गर्ने निर्णय गरेको छ।

मन्त्रिपरिषदको सोमबार बसेको बैठकले कोभिड—१९ संकट व्यवस्थापन सेन्टर (सीसीएमसी)को सिफारिसअनुसार १ भदौबाट खुला गर्ने भनिएको क्षेत्र थप १५ दिन नखोल्ने निर्णय गरेको हो।

साउन ५ गते बसेको मन्त्रिपरिषद् बैठकले चार महिना लामो लकडाउन अन्त्य गर्दै लामो दूरीका सार्वजनिक यातायात, बाह्य तथा आन्तरिक हवाई उडान तथा विद्यालय भर्ना लगायतका गतिविधि भदौ १ गतेदेखि निर्णय गरेको थियो। तर, आजको मन्त्रिपरिषद् बैठकले ती सबै १५ दिन पर धकेलिएको छ।

कोरोना भाइरस संक्रमणको जोखिम बढेको भन्दै सीसीएमसीले छोटो, मध्य र लामो दुरीमा अन्तरजिल्ला निजी तथा सार्वजनिक यातायात, आन्तरिक तथा अन्तराष्ट्रिय व्यवसायिक उडान, खेलकुद प्रशिक्षण, विद्यार्थी भर्ना, शैक्षिक तथा अन्य परीक्षाजस्ता कार्य भदौ १५ सम्म स्थगित गर्न सिफारिस गरेको थियो।

त्यस्तै, कलकारखाना, उद्योग सञ्चालन भएसँगै मजदुरहरूको दैनिक आवतजावत बढेकाले संक्रमणको जोखिम पनि बढेको भन्दै सरकारले उद्योग तथा कलकारखानाभित्र क्वारेन्टाइनको व्यवस्था गर्ने र स्वास्थ्य मापदण्ड पूरा गरेपछि मात्रै सञ्चालन गर्न दिने निर्णय गरेको छ।

बैठकले सीमा नाकामा पनि अवैध आवतजावत जारी रहेको भन्दै थप कडाई गर्ने निर्णय गरेको छ। यसअघि भारतबाट नेपाल प्रवेशका लागि तोकिएका २० प्रवेश विन्दू घटाएर १० वटामा झारिएको छ भने अन्यत्रबाट छिर्न पूर्ण प्रतिबन्ध लगाउने निर्णय गरेको जनाइएको छ।