पौडेल समूह सभापतिका आकाक्षी व्यवस्थापन गर्नै सकस परे ।

साउन, काठमाडौं । प्रमुख प्रतिपक्षी नेपाली कांग्रेसको १४ औं महाधिवेशनका लागि अहिले तल्ला तहहरुले क्रियाशील सदस्यता वितरण र नविकरणको कामलाई तिव्र रुपमा अगाडी बढाइरहेका छन् ।

आगामी फागुन ७–१० गते काठमाडौंमा तोकिएको महाधिवेशनले नयाँ नेतृत्व पनि चयन गर्ने भएकाले नेताहरुबीच नेतृत्वमा पुग्नका लागि होडबाजी चलिरहेको छ । मुलुककै पुरानो लोकतान्त्रिक पार्टी कांग्रेसमा एक से एक नेताहरु भएकाले पाका नेताहरु नेतृत्वमा पुग्नका लागि आफ्नो पक्षमा लविङ गर्ने र शक्ति आर्जन गर्नमा ध्यान दिइरहेका छन् ।

विगतदेखि नै दुई प्यानलमा नयाँ नेतृत्व चयन गर्ने निर्वाचन हुँदै आएको कांग्रेसमा पछिल्ला केही महाधिवेशनबाट तीन प्यालनमा निर्वाचन हुँदै आएको छ ।

१२ औं महाधिवेशनमा सुशील कोइराला, शेरबहादुर देउवा र भिमबहादुर तामाङको प्यानल, १३ औं महाधिवेशनमा रामचन्द्र पौडेल, शेरबहादुर देउवा र कृष्णप्रसाद सिटौलाको प्यानलबीच नेतृत्व र नयाँ कार्यसमिति निर्वाचित गर्न प्रतिष्पर्धा भयो ।

अब १४ औं महाधिवेशनमा भने अहिलेको अवस्था रहयो भने आधा दर्जनबढि प्यानल हुने देखिएको छ । अहिले संस्थापनमा भन्दा नेता रामचन्द्र पौडेल समूहमा नेतृत्वमा पुग्नका लागि धेरै नेताहरुले प्रयास गरिरहेका छन् ।

पौडेल समूहबाट स्वयं पौडेल सभापतिका लागि आकाक्षी छन् । उनले आफ्नो पक्षमा माहोल बनाउन अनेकन प्रयास गरिरहेका छन् ।

त्यस्तै सोही समूहबाट महामन्त्री डा.शशांक कोइरालाले सभापतिको उम्मेदवार हुने सार्वजनिक गरिसकेका छन् । केन्द्रीय सदस्य तथा प्रभावशाली नेता डा. शेखर कोइराला विगत तीन वर्षदेखि देश दौडाहा गर्दै सभापतिको तयारीमा जुटिरहेका छन् ।

पौडेल समूहबाटै गणेशमान सिंहका पुत्र प्रकाशमान सिंह र पूर्वसहमहामन्त्री डा. रामशरण महतले सभापतिको दाबेदारी सार्वजनिक रुपमै गरिसकेका छन् ।

१३ औं महाधिवेशनमा नेता कृष्णप्रसाद सिटौलाले केही नेता चोइट्याउदा त देउवासँग नेतृत्वसहित केन्द्रमा बहुमत गुमाएको सो समूहमा अहिले नेतृत्वका लागि देखिएको यो होडबाजीले झन समस्या पारेको छ ।

पुरानो संस्थापनबाट नेताहरु पौडेल, सिंह र कोइराला परिवारका सदस्यबीच सहमतिमा एउटै प्यानल बनाउन सके पल्ला भारी हुने बिजय हासिल गर्न सकिन्छ भन्ने बुझाइ छ ।

तर, नेताहरुबीच नेतृत्वका लागि जुंगाको लडाइ सुरु भएकाले एउटै प्यानल हुनेमा कुनै नेताहरु पनि विश्वस्त छैनन् । कोइराला परिवार आफ्नो विरासत उल्टयाउन चाहन्छ भने, पौडेल आफू नै सिनियर भएकाले नेतृत्वमा सर्वसम्मत उम्मेदवार बन्नुपर्छ भनिरहेका छन् ।

अर्कोतर्फ गणेशमान सिंह पुत्र प्रकाशमान पनि उपसभापति, महामन्त्री भइसकेकाले नेतृत्वका लागि प्रतिष्पर्धा गर्ने मनस्थितिमा पुगेर सार्वजनिक कार्यक्रममै उम्मेदवारी घोषणा गरिसकेका छन् ।

यता संस्थापनमा सभापति देउवाले नै दोहर्‍याउने भएपछि अन्य नेताहरुको आकाक्षा बाहिर आएको छैन ।

१३ औं महाधिवेशनमा सभापतिको उम्मेदवार भएका कृष्णप्रसाद सिटौला १४ औं महाधिवेशनमा पनि नेतृत्वका लागि भिड्न सम्पर्क कार्यालय खोलेर तयारीमा लागिसकेका छन् ।@वर्णन Media