कुसुमखोला क्षेत्रको आगजनी घरबस्तीमा नभई मकै हेर्न बनाइएको मचानमा लगाइएको :वनमन्त्री

साउन, चितवन । वनमन्त्री शक्तिल बहादुर बस्नेतले माडीको कुसुमखोला क्षेत्रमा घर वा बस्तीमा नभई मकै हेर्न बनाइएको मचानमा आगो लगाइएको अभिव्यक्ति दिनुभएको छ ।

प्रतिनिधिसभाको कानुन, न्याय तथा मानव अधिकार समितिको आइतबार बसेको बैठकमा मन्त्री बस्नेतले बस्तीमा आगो नलगाइएको जिकीर गर्दै मान्छे बस्ने घरलाई नभई गोठ भत्काइएको समेत दावी गर्नुभयो । आगलागी हुँदैगरेको तस्वीर कुसुमखोलाको नभएको समेत बस्नेतले भनाई थियो ।

यसैबिच, समितिले विपदको समयमा वैकल्पिक व्यवस्थाबिना राष्ट्रिय निकुञ्ज वरपरका घरबास नउठाउन सरकारलाई निर्देशन दिएको छ । समितिको आइतबार बसेको बैठकले संविधानले प्रदान गरेको सम्मानपूर्वक बाँच्न पाउने अधिकार र बासस्थानको हकविपरीत जनतालाई विपद्को समयमा घरबास उठाउने कार्य नगर्न नगराउन वन मन्त्रालयलाई निर्देशन दिने निर्णय गरेको हो ।

त्यसैगरी माडीमा चेपाङ समुदायका परिवारको घर भत्काउने र आगजनी कार्य गैरकानुनी भन्दै घटनामा संलग्नलाई कारवाही गर्न पनि निर्देशन दिइएको समितिका सभापति कृष्णभक्त पोखरेलले जानकारी दिनुभयो ।