आज २२३ जना नेपाली बिद्यार्थी र कामदार बोकेर उड्यो नेपाल एयरलाइन्स

जेठ, काठमाडौँ | नेपालको एक मात्र अन्तर्राष्ट्रिय विमानस्थल ‘त्रिभुवन अन्तर्राष्ट्रिय विमानस्थल’ बाट आइतबार राति २३७ जना स्वदेशी तथा जापानी नागरिक जापानको लागि उडेका छन् । जारी लकडाउनको कारण सुनसान अवस्थामा रहेको विमानस्थलबाट आज सहित नेपाल एयरलाइन्सले तेश्रो उडान भरेको हो ।

त्रिभुवन अन्तर्राष्ट्रिय विमानस्थलबाट साझा सबाल मिडियाले पाएको जानकारी अनुसार आज जापानका लागि २२३ जना नेपाली नागरिक र १४ जना जापानी नागरिक सहित २३७ जना यात्रु बोकेर नेपाल एयरलाइन्सको ए-३३० जहाजले जापानको नारिता स्थित विमानस्थलको लागे उडान भरेको हो । नेपाली समय अनुसार ९:२० बजे उक्त विमान उडान गरिएको छ । सोहि बिमानले गत शुक्रबार राति ९:३० बजे पनि नेपाली तथा जापानी नागरिक लिएर जापानको लागि उडान भरेको थियो ।

जापानबाट नेपालमा लकडाउन अघि बिदामा आएका तथा भिषाको म्याद सकिने क्रममा रहेकाहरुले साविकको भन्दा तेब्बरसम्म भाडा तिरेर चार्टर्ड उडान गरेका हुन् । यसरी उडान गर्दा प्रतिव्यक्ति हवाई भाडा १ लाख ६० हजारसम्म तिरेको बुझिएको छ ।

कोरोना भाइरस विश्वभरी नै महामारीको रुपमा फैलिएपछि त्रासका कारण नेपाल सरकारले सबै देशबाट आउने नेपाली तथा विदेसीलाई आगमनमा रोक लगाएपछि त्रिभुवन अन्तर्राष्ट्रिय विमानस्थल सुनसान बनेको अवस्थामा यो सहित नेपाल एएरलाइन्सको जापानको लागि तेश्रो उडान हो । यसअघि चैत २८ गते निगमले नारितामा चार्टर्ड उडान गरेको थियो । निगमले यो महिनामात्रै जापानमा तीन वटा चार्टर्ड उडान गर्दैछ । गत शुक्रबार दोश्रो उडान भएकोमा आज तेश्रो उडान भएको छ । आगामी मे २२ मा पनि नारितमा चार्डड उडान हुँदैछ ।

विमानस्थलमा आइतबार राति केहि चहलपहल देखियो । उडान भर्ने यात्रु तथा उनीहरुलाई विमानस्थलसम्म छाड्न जानेहरुको भीड देखिन्थ्यो ।

गत शुक्रबार सहित आज आइतबार उडेको चार्टर्ड विमानमा जारी लकडाउनको कारण नेपालमा रोकिएका केही जापानिज नागरिक तथा बिदामा आएका नेपाली कामदार र विद्यार्थीहरुले यात्रा गरेका छन् । आज राति उडान भरेको उक्त विमानले करिव साढे ७ घण्टाको उडानपछि जापानको नारितामा अवतरण गर्नेछ । आज उडेको चार्टर्ड जहाज भोली जापानबाट रित्तै काठमाडौँ फिर्ता हुनेछ । साथै आगामी चार्टर्ड उडान पनि नेपाल फर्कँदा रित्तै हुनेछ ।

जापानका लागि पछिल्लो दुई उडानका लागि निगमको वाइडबडी जहाज काठमाडौँको सुमेघ टूर एण्ड ट्राभल्स प्रालिले चार्टर्ड उडानको अनुमति लिएको निगमले जनाएको छ ।

नेपाल एयरलाइन्सले जापानको नारितामा गत फागुन १९ गतेदेखि सिधा उडान सेवा सुरू गरेको थियो । कोभिड–१९ को सङ्क्रमण विश्वभर फैलिएपछि उक्त गन्तव्यको उडान हाललाई स्थगन भएको छ ।

कोरोना महामारीको कारण यतिखेर बिभिन्न देशमा नेपालीहरु बिमानस्थल खुल्ने आशामा छन् । सरकारले आन्तरिक तथा वाह्य हवाई उडानहरु बन्द गरेको कारण समस्यामा परेका नेपालीहरु समेत नेपाल आउन पाएका छैनन । बिभिन्न देशमा रोकिएका झन्डै ५ लाख नेपालीहरुले आफूहरु नेपाल आउन चाहेको इच्छा प्रकट गरेका छन् । सरकारले तत्काल ल्याउनुपर्ने नेपालीहरुको शंख्या २ लाखको हाराहारीमा भएको अनुमान गरेको छ । प्राथमिकताको आधारमा नेपालीहरुलाई नेपाल ल्याई व्यवस्थापन गर्ने सरकारले बताएको भएपनि कुनै निर्णय लिन सकेको छैन ।

नेपालबाट चाटर्ड उडान भईरहँदा विदेशबाट रित्तै फर्किने विमानमा अति समस्यामा परेका नेपालीहरुलाई उद्दार गरि ल्याउन सकिने तर सरकारले त्यसतर्फ ध्यान नदिएको भन्दै टिप्पणीहरु गरिएका छन् । @Saghasabal