नेकपा सचिवालय बैठक : प्रधानमन्त्री बीचैमा बाहिरिए

सत्तारुढ दल नेपाल कम्युनिस्ट पार्टी (नेकपा) को सचिवालय बैठकमा जारी रहेकै समयमा प्रधानमन्त्री एवं अध्यक्ष केपी शर्मा ओली बैठकबाट बाहिरिएका छन्।

बुधबार अपरान्ह प्रधानमन्त्री निवास बालुवाटारमा सुरु भएको सचिवालय बैठकमा एक व्यक्ति एक पदका विषयमा विवाद भएपछि प्रधानमन्त्री ओली बैठकबाट बाहिरिएको स्रोतले बतायो।

‘सचिवालय बैठक चलिरहेकै समयमा प्रधानमन्त्री बीचमै उठेर हिड्नुभएको छ, उहाँ उठेर हिँडे पनि बैठक भने जारी छ, अन्य नेताहरु भित्रै हुनुहुन्छ’ सचिवालय स्रोतले नेपालखबरसँग भन्यो।

बिहीबार (भोलि) बस्ने स्थायी कमिटी बैठकका एजेन्डा तय गर्न सचिवालयको बैठक बसेको हो।

गत शनिबार बसेको सचिवालय बैठकले पार्टीभित्र देखिएको विवाद समाधानका लागि एक व्यक्ति एक जिम्मेवारीमा सहमति गरेको थियो।

उक्त बैठकमा एक व्यक्ति एक मुख्य जिम्मेवारीमा सहमत भई कमजोरीप्रति आत्मालोचनासमेत गरेका प्रधानमन्त्री ओलीले त्यसपछि भने सो सहमतिको विपक्षमा देखिँदै आएका थिए।

अध्यक्ष प्रचण्ड, वरिष्ठ नेता झलनाथ खनाल, माधवकुमार नेपालसँग यसअघि भएका छुट्टाछुट्टै भेटमा पनि प्रधानमन्त्री ओलीले सो सहमति पालना नगर्ने संकेत गरिसकेका थिए।@नेपालखबर