प्रधानमन्त्री वा पार्टी अध्यक्षबाट ओलीको राजीनामा: दाहाल-नेपालको वटमलाइन

काठमाडौं । दुई दिनयता बालुवाटारदेखि कोटेश्वर र कोटेश्वरदेखि खुमलटारको चक्कर लगाएका नेकपा स्थायी कमिटी सदस्य तथा प्रदेश ५ का मुख्यमन्त्री शंकर पोखरेलले आइतवार साँझ सामाजिक सञ्जालमा लेखे ‘पार्टी एकता जोगाउन, विश्वास र सहकार्यको वातावरण तयार गरौ । आपसी कटाक्ष र टिप्पणी वन्द गरौ। मिले जितिन्छ, झगडाले नासिन्छ, गंभीर बनौ।’

नेता पोखरेलको टिप्पनीले स्पष्टै थाहा हुन्छ पछिल्लो समय नेकपाभित्र गम्भीर संकट पैदा भएको छ । पार्टीका शीर्ष नेताहरुबीच जुहारी मात्र चलेको छैन पार्टी नै विभाजनतिर गएको संकेत पोखरेले गरेका छन् । नेकपाभित्र नेताहरुबीच समस्या पैदा हुँदा यसअघि महासचिव विष्णु पौडेल बालुवाटार, कोटेश्वर र खुमलटार धाउने गर्दथे । तर यसपटक प्रधानमन्त्री ओलीले महासचिव पौडेललाई यो जिम्मेवारी दिएनन् । पौडेलले खेल्दै आएको भूमिका मुख्यमन्त्री पोखरेलले खेल्न थालेको छन् ।

दुई दिन लगातार नेकपा बरिष्ठ नेता माधव नेपालसँग भेट गरेका मुख्यमन्त्री पोखरेलले आइतवार अर्का अध्यक्ष पुष्पकमल दाहाल प्रचण्डसँग भेट गरेका छन् । प्रचण्ड निवास खुमलटार पुगेर पोखरेलले पार्टीका शीर्ष नेताहरुबीच बढेको दुरी कम गर्ने प्रयास गरे । तरपनि दाहाल नेपाल पक्ष भने सकारात्मक हुने अबस्था छैन ।

प्रधानमन्त्री केपी शर्मा ओलीको स्वच्छाचारी शैली परिवर्तन गराउन ६ सचिवालय सदस्य एक ढिक्का भएका छन् । ओलीले पार्टी अध्यक्ष वा प्रधानमन्त्री मध्ये एक पद छोड्नु पर्ने बटम लाइन बनाएका छन् । दुवै पद लिएका कारण ओली स्वच्छाचारी भएको निस्कर्ष दाहाल नेपाल पक्षको छ । स्थायी कमिटीको बैठकबाट एक पद छोड्ने निर्णय गराउने पक्षमा दाहाल र नेपाल रहेका छन् ।

केही समयअघिसम्म वरिष्ठ नेता नेपाल ओलीको कार्यशैली मात्र फेर्ने पक्षमा थिए । तर अहिले प्रधानमन्त्री वा पार्टी अध्यक्ष पद छोड्नु पर्ने पक्षमा पुगेका छन् । नेपाल निकट स्थायी कमिटीका नेताहरुले सधै दविने गरी नबस्न नेपाललाई आग्रह गरेका छन् ।

आइतवार नेपाल समुहका स्थायी कमिटी सदस्यहरुको बैठक कोटेश्वरमा बसेको थियो । बैठकमा नेपालले अहिलेको अबस्थाका बारेमा व्रिफिड गरेका थिए । त्यसपछि स्थायी कमिटीका सदस्यहरुले तत्काल स्थायी कमिटी बैठक बोलाउनु पर्ने र नबोलाए विकल्पमा तयार रहनुपर्ने निस्कर्ष निकालेको स्रोतले बताएको छ ।

नेपाल निकट स्थायी कमिटी सदस्यहरुको छलफलमा अर्का अध्यक्ष पुष्पकमल दाहाल प्रचण्ड पनि सहभागी भएका थिए । उनले ओलीको कार्यशैलीका कारण कम्यूनिष्ट पार्टी नै समाप्तीको बाटोमा गएको बताएका थिए । उनले पनि दुई मध्ये एक पद ओलीले छोड्नु पर्ने बताए ।
लगतै प्रचण्ड निवास खुमलटार पुगे । खुमलटारमा आफु निकट स्थायी कमिटीका सदस्यहरुसँग छलफल गरेका थिए ।

कोटेश्वर र खुमलटारमा भएका छलफलले एउटै निस्कर्ष निकालेका छन् । स्थायी कमिटीको बैठक ओलीले नडाके विकल्प खोज्ने निस्कर्ष निकालेका छन् । प्रधानमन्त्री ओली र स्थायी कमिटी बैठक बोलाउने विकल्प खोज्ने उनीहरुले बताए । ओलीले बैठक नडाके अध्यक्षको हैसियतमा प्रचण्डले स्थायी कमिटीको बैठक बोलाउने भएका छन् ।

दाहाल नेपाल आफु निकटका स्थायी कमिटीका सदस्यहरुसँग छलफल गरेको केही समयपछि प्रधानमन्त्री ओली राष्टपति भेट्न शीतल निवास पुगेका थिए ।