अस्पतालको ओपीडी टिकट शुल्क ७०० बढी लिन माग, सस्तो भएको भन्दै चिकित्सकको आपत्ति

चितवन, फागुन २१-

नेपालका चिकित्सकहरु अस्पतालको ओपीडी टिकटको शुल्क बढाउने तयारीमा जुटेका छन् । उनीहरुले शुल्क बढाउनका लागि दबाब स्वरुप मन्त्रालयमा ज्ञापनपत्र समेत बुझाएका छन् ।

‘हरेक दुई वर्षमा वृद्धि हुने अस्पतालको ओपीडी टिकटको शुल्क २०७१ सालदेखि बढेको छैन । त्यतिखेर सरकारले मेडिकल अफिसरले २५० र कन्सल्टेन्टको टिकट ४५० रुपैयाँ तोकेको थियो ।’ नेपाल चिकित्सक संघ केन्द्रीय समितिका अध्यक्ष डाक्टर लोचन कार्कीले भने, ‘टिकट शुल्क वृद्धि गर्नुपर्छ भन्दै हामीले स्वास्थ्य मन्त्रालयमा ज्ञापनपत्र पेस गरेका छौँ ।’ चिकित्सक संघले ओपीडी टिकट ४५० देखि ७५० रुपैयाँ हुनुपर्ने माग राखेको छ । स्वास्थ्य मन्त्रालयको प्रतिनिधि, नेपाल चिकित्सक संघ, अफिमको प्रतिनिधि र नेपाल मेडिकल काउन्सिल रहने समितिले शुल्क तोक्ने गर्दछ ।

तत्कालीन स्वास्थ्यमन्त्री उपेन्द्र देवकोटाको समयमा हरेक दुई वर्षमा टिकट शुल्क तोक्नुपर्ने नियम बनाए पनि अहिलेसम्म कुनै मिटिङ पनि नबसेको उनले बताए । ‘अस्पतालको ओपीडी टिकटको शुल्क तोक्दा एक किलो खसीको मासु ४५० रुपैयाँमा पाइन्थ्यो । अहिले पनि हामीले नेपाल राष्ट्र बैँकको महँगाई दर हेरेर शुल्क तोक्न सिफारिस गरेका छौँ’ कार्कीले भने, ‘सरकारले शुल्क नतोकेमा आफ्नो मूल्य आफै तोक्छौँ । इन्जिनियर, वकिललगायत अन्य पेशाकर्मीले आफै मूल्य तोक्न हुने हामीले नहुने ?”

चार दिनभित्र सरकारले शुल्क नतोकेमा आफूहरुले नै ओपीडी शुल्क बृद्धि गर्ने उनले बताए । चिकित्सकहरुले पाँच महिनाअघि शुल्क बृद्धि गर्न माग गरेका थिए । त्यसलाई मेडिकल काउन्सिलले स्वीकृति दिएको पनि स्वास्थ्य मन्त्रालयले बेवास्ता गरेको उनको भनाइ छ ।
सार्क मुलकमै सबैभन्दा कम सेवा शुल्कमा नेपालका चिकित्सकले स्वास्थ्य सेवा दिइरहेको उनले दाबी गरे । ‘विश्व स्वास्थ्य संगठनको नियम अनुसार एउटा टिकटको ६० डलर तोकेको छ । भारतमा पनि एक हजार ५०० आईसी छ । भुटानमा त त्यहाँको सरकारले निःशुल्क स्वास्थ्य सेवा दिने गरेको छ’, अध्यक्ष कार्कीले भने, ‘नेपालमा डाक्टरको तलब पनि न्यून छ ।’

अहिले नेपालमा मेडिकल अफिसरको तलब ४० हजार रुपैयाँ रहेको संघका उपाध्यक्ष डाक्टर विक्रम कार्कीले बताए । ‘हामीले ३६ महिना लगाएर पढ्छौँ, शैक्षिक शुल्क सरकारले ४२ लाख रुपैयाँ तोकिदएको छ तर तलब तोक्छ ४० हजार’ उनले भने, ‘बिरामी पनि चिकित्सकहरुले बढी हेर्नुपर्ने अवस्था रहेको छ ।’ यही अवस्थामा गएमा नेपालबाट चिकित्सकहरु पलायन हुने अवस्थामा रहेको उनको भनाइ छ ।

ओपीडी टिकटको शुल्क डाक्टरलाई जाने गर्दछ । तर, अस्पताल प्रशासनले पुरा पैसा नदिने गरेको अर्थोपेडिक डाक्टर कृष्णप्रसाद पौडेलले बताए । ‘ओपीडी टिकट शुल्क हाम्रो हो । यहाँ अस्पताल प्रशासनले अन्य सेवा शुल्क देखाएर ६० प्रतिशत मात्र दिन्छन् ।’ उनले भने, ‘डाक्टरको तलब समय सापेक्ष छैन ।’ चितवनका निजी अस्पतालहरुले भने टिकट शुल्क ५०० रुपैयाँ लिँदै आएका छन् ।