एक हप्तामै ७०० चिनियाँ नेपाल आए, चरम लापरवाही गर्दै सरकार

काठमाडौं : कोरोनाले महामारी मच्चाएको चीनबाट एकसातामै ७०० चिनियाँ नेपाल भित्रिएका छन्। तर, विश्वका कैयौं देशले चीनसँगको आवतजावत ठप्पै पारेपनि नेपाल सरकारले भने विना रोकतोक चिनियाँहरुलाई सजिलै नेपाल प्रवेश दिइरहेको छ।

सरकारले विमानस्थलमा स्वास्थ्य जाँच गर्ने उपकरण राखिएको र परीक्षणमा संक्रमण नदेखिएकालाई मात्र नेपाल आउन दिएको बताएपनि यथार्थ भने फरक छ। चीनबाट अमेरिकाको सियाटल पुगेका एक नागरिकको मेडिकल स्क्रिनिङमा समस्या नदेखिएपनि पछि उनी संक्रमित भएको पुष्टि भएको थियो।

ती नागरिकबाट नै फैलिएको कोरोनाका कारण चीनमा अहिले करिब एकदर्जन मानिसहरुमा कोरोना संक्रमण भइसकेको छ। अमेरिकाले प्रविधिमार्फत पत्ता लगाउन नसकेको र पछि फैलिएको कोरोना संक्रमण रोक्न नेपालले भने उदासिनता देखाएको छ।

अहिले कैयौं देशले चीनमा रहेका आफ्ना नागरिकलाई उद्दार गरी आफ्नो देश फर्काएपनि क्वारेन्टाइनमा निश्चित अवधिसम्म राखेर मात्र परिवारसँग प्रत्यक्ष भेटघाट गर्न दिएका छन्। तर नेपालमा भने चीनबाट आएका सबै मानिसहरुलाई गुपचुप सजिलै गन्तव्यमा पुग्न दिइएको छ। यस्तो लापरबाही भइरहँदा नेपाल कोरोनाको उच्च जोखिममा रहेको स्वास्थ्य विशेषज्ञहरुले चेतावनी दिइरहेका छन्

चीनमा कोरोनाका कारण हालसम्म ९०० मानिसहरुको मृत्यु भइसकेको छ भने करिब एक लाख मानिसहरु संक्रमित भएका छन्। यस्तो संकटपूर्ण अवस्थामा रहेको संक्रमित मुलुकबाट आएका चिनियाँहरुलाई नेपाल सरकारले भने फूलमालाले स्वागत गरिरहेको छ।

सरकारले भ्रमण बर्ष २०२० मा २० लाख पर्यटक भित्र्याउने लक्ष्य लिएको छ। सोही संख्या पुर्‍याउन जस्ता मानिसलाई पनि सामान्य जाँचकै भरमा विमानस्थलबाट सजिलै बाहिर पठाउने गरिएको छ। जबकी कोरोना नियन्त्रणमा चीन समेत आत्तिइरहेको छ।

बालुवाटारमा मुरली बजाएर रमिता देखाउने गरेको प्रधानमन्त्रीले धमाधम चिनियाँ नागरिकलाई नेपाल आउन दिइरहँदा त्यहीँ रहेका १८० नेपालीको भने बिचल्ली भएको छ। विश्वका सबैजसो देशले चीनमा रहेका आफ्ना नागरिकलाई फिर्ता लगिसक्दा पनि नेपाल सरकारले आफ्ना नागरिक उद्दार गर्न आलटाल गरिरहेको छ।

चीनबाट ल्याउने नेपालीलाई राख्ने स्थानको टुङ्गो समेत लगाउन नसकेको सरकारले चिनियाँलाई भने सजिलै विमानस्थल पार गर्न दिइरहेको हो।
अहिले सरकारले न त कोरोना संक्रमण फैलन नदिन पर्याप्त तयारी गरेको छ, न त विमास्थलमा रहेको हेल्थ डेस्ककै काम प्रभावकारी देखिएको छ। चिनियाँ नागरिक देख्नेवित्तिकै हेल्थ डेस्कका कर्मचारी भाग्ने गरेको र सजिलै विमानस्थलबाट बाहिर आउन दिने गरेको खबर बाहिरिइरहेको छ।

तर नियामक स्वास्थ्य मन्त्रालयले भने हेल्थ डेस्क राखेको दाबी गर्दै कोरोना संक्रमण रोकथाममा हेल्चक्र्याइँ गरिरहेको छ। अझ, हेल्थ डेस्क राखेकै भरमा विश्वस्तरीय सतर्कता अपनाइरहेको हास्यास्पद दाबी गरिरहेको छ।

विमानस्थलमा राखिएको स्क्रिनिङ मेसिनले शरीरको सामान्य तापक्रम मात्रै देखाउने गर्छ। त्यहीमाथि पनि यी मेसिन बारम्बार बिग्रने गरेको छ। यही सामान्य पूर्वाधारकै भरमा सरकारले छिमेकी मुलुक चीनबाट फैलिएको कोरोना नियन्त्रणमा उदासिनता देखाइरहेको छ।

न त सरकारसँग कोरोना संक्रमण फैलिए के गर्ने भन्ने स्पष्ट योजना छ, न त सरासर नेपाल आइरहेका चिनियाँलाई रोक्न नै सकेको छ। चीनका विभिन्न प्रान्तबाट दैनिक आइरहेका सयौं यात्रीले नेपालमा सहजै प्रवेश पाइरहेका छन्।

त्रिभुवन विमानस्थलको अध्यागमन कार्यालयको तथ्यांकअनुसार विगत ७ दिनमा ७०० चिनियाँ नागरिक नेपाल पसिसकेका छन्। यसहिसाबले कोरोना फैलिएपछिको एक महिनाको अवधिमा हजारौं चिनियाँले नेपालमा सहजै प्रवेश पाएका छन्।

चीनलाई ट्रान्जिट बनाएर नेपाल आउने विदेशीको संख्या त त्यो भन्दा पनि बढी छ। ###Nepal Pana###