चितवनमा सक्रिय संक्रमितको संख्या १७ सय नाघ्यो, निषेधाज्ञा एक हप्ताको लागि लम्बियो

भरतपुर, साउन । जिल्ला प्रशासन कार्यालय चितवनले लामो दुरीका सार्वजनिक गाडी सञ्चालनलाई केहि खुकुलो बनाएको छ ।प्रमुख जिल्ला अधिकारी प्रेमलाल लामिछानेले जारी निषेधाज्ञालाई साउन १४ गते राती १२ बजेसम्म लम्ब्याउँदै लामो दुरीका सार्वजनिक गाडीको सञ्चालनलाई केहि खुकुलो बनाएका छन् ।

चितवनबाट छुट्ने मध्यम तथा लामो दुरीका सार्वजनिक सवारी साधनहरु स्वास्थ्य सुरक्षाको मापदण्ड पालना गरी अत्यावश्यक प्रयोजनका लागि सञ्चालन गर्न पाउने भएका छन् । यसका लागि सम्बन्धित यातायात व्यवसायी संघको सिफारिस र जिल्ला ट्राफिक प्रहरी कार्यालयको समन्वयमा सिमित संख्यामा सञ्चालन गर्न पाइने भएको हो ।

बाहिरी जिल्लाबाट आउने सवारी साधनको हकमा सम्बन्धित जिल्लाको सिफारिस भए/नभएको हेरेर सञ्चालन गर्न दिइने प्रजिअ लामिछानेले बताए ।

चिकित्सा शिक्षा आयोगले साउन ९ गते लिने स्नातक तहको प्रवेश परीक्षा र निकट भविष्यमा सञ्चालन हुने कक्षा ११ को परीक्षा एउटा कोठामा २५ जना र एउटा बेन्चमा एक जना मात्र रहने गरी सञ्चालन गर्न पाइने भएको छ ।

अन्य क्षेत्रमा लगाइएको निषेधाज्ञालाई यथावत राखिएको छ ।

चितवनमा आज ८३ जना कोरोना संक्रमित थपिएका छन् । स्वास्थ्य कार्यालय चितवनका अनुसार विगत २४ घण्टामा गरिएको परीक्षणमा सो संक्रमित थपिएका हुन् । थपिका संक्रमितमध्ये भरतपुर महानगरपालिकामा ४९ जना, खैरहनीमा ८ जना, माडीमा ७ जना, रत्ननगर नगरपालिकामा १२ जना, राप्तीमा २ जना र कालिकामा ५ जना रहेका छन् ।

यो सँगै चितवनमा जम्मा सक्रिय संक्रमितको संख्या १७१४ पुगेको छ । जसमध्ये घरमा १५९२, अस्पतालको आइसोलेसनमा ११२ जना र सार्वजनिक आइसोलेसनमा १० जना रहेका छन् । आज चितवनको एक जनाको मृत्यु भएसँगै चितवनमा कोरोनाका कारणबाट ३१८ जनाले ज्यान गुमाइसकेका छन् ।