यस वर्षको एसईई परीक्षा चैत १९ देखि २९ सम्म सञ्चालन हुने

राष्ट्रिय परीक्षा बोर्डले यस वर्ष कक्षा १० को अन्तिम परीक्षा अर्थात् माध्यमिक शिक्षा परीक्षा (एसईई) चैत १९ गतेदेखि २९ गतेसम्म देशभर एकैसाथ सञ्चालन गर्ने भएको छ।

बोर्डले बुधबार परीक्षा तालिका सार्वजनिक गर्दै निर्धारित मितिमा परीक्षा सञ्चालन हुने जानकारी दिएको हो। प्रकाशित तालिकाअनुसार चैत १९ गते अनिवार्य अंग्रेजी, २० गते अनिवार्य नेपाली, २२ गते अनिवार्य गणित, २३ गते अनिवार्य विज्ञान र २४ गते सामाजिक विषयको परीक्षा हुनेछ। त्यसैगरी २५ गते ऐच्छिक प्रथम पत्र र २६ गते ऐच्छिक द्वितीय पत्रको परीक्षा सञ्चालन गरिनेछ।

बोर्डअन्तर्गत कक्षा १० का परीक्षा नियन्त्रक टुकराज अधिकारीका अनुसार चैत २७, २८ र २९ गते प्राविधिक धारतर्फका पुराना तथा नयाँ पाठ्यक्रमअनुसारका विषयको परीक्षा सञ्चालन हुनेछ।

गत वर्षको एसईई परीक्षा चैत ७ गतेदेखि सुरु भएको थियो। यस वर्ष भने फागुन २१ गते हुने प्रतिनिधिसभा निर्वाचनका कारण परीक्षा करिब १२ दिन पछाडि सारिएको बोर्डले जनाएको छ। साथै, जनक शिक्षा सामग्री केन्द्रले निर्वाचनका लागि मतपत्र छपाइको काम गरिरहेकाले र एसईई परीक्षाका प्रश्नपत्र पनि सोही केन्द्रबाट छापिनुपर्ने भएकाले परीक्षा मिति केही दिन सार्नुपरेको बोर्डको भनाइ छ।

बोर्डका अनुसार यस वर्ष एसईई परीक्षाका लागि पाँच लाख १७ हजार विद्यार्थीले आवेदन दिएका छन्। गत वर्ष नियमिततर्फ चार लाख २१ हजार ५८५ र ग्रेड वृद्धितर्फ ७५ हजार ५३९ विद्यार्थी परीक्षामा सहभागी भएका थिए।

बोर्डले परीक्षा मर्यादित, व्यवस्थित र समयमै सम्पन्न गर्न आवश्यक सबै तयारी अघि बढाइएको जनाएको छ।