आज अपराह्नसम्म समानुपातिक तर्फको उम्मेदवारी फिर्ता लिन सकिने

आगामी फागुन २१ गते हुने प्रतिनिधि सभा निर्वाचनका लागि समानुपातिक निर्वाचन प्रणालीतर्फ उम्मेदवार बनेकाहरूले आज अपराह्नसम्म आफ्नो उम्मेदवारी फिर्ता लिन सक्ने भएका छन्।

निर्वाचन आयोगले जारी गरेको सूचनाअनुसार प्रतिनिधि सभा सदस्य निर्वाचनमा राजनीतिक दलहरूले पेस गरेको बन्दसूचीमा समावेश उम्मेदवारहरूले आज अपराह्न ४ बजेसम्म उम्मेदवारी फिर्ता लिन पाउने व्यवस्था गरिएको छ। आयोगबाट स्वीकृत निर्वाचन कार्यक्रमअनुसार यही पौष १३ र १४ गते पेस गरिएका बन्दसूचीमा रहेका उम्मेदवारले नाम फिर्ता लिन सक्नेछन्।

निर्वाचन आयोगका अनुसार समानुपातिक निर्वाचन अधिकृतको कार्यालयमा आज बिहान १० बजेदेखि अपराह्न ४ बजेसम्म उम्मेदवारी फिर्ता लिन सकिनेछ। यस सम्बन्धमा सबै सम्बन्धित उम्मेदवारलाई जानकारी गराइसकिएको निर्वाचन अधिकृत कृष्णबहादुर राउतले जानकारी दिए।

बन्दसूचीमा नाम समावेश भएका उम्मेदवारले नाम फिर्ता लिन चाहेमा प्रतिनिधि सभा सदस्य समानुपातिक निर्वाचन निर्देशिका, २०८२ को अनुसूची १८ बमोजिमको ढाँचामा निवेदन दिनुपर्नेछ। कुनै कारणवश उम्मेदवार स्वयं उपस्थित हुन नसक्ने अवस्थामा वारेसमार्फत पनि निवेदन पेस गर्न सकिने व्यवस्था गरिएको निर्वाचन आयोगले जनाएको छ।

कुल २७५ सदस्यीय प्रतिनिधि सभामा प्रत्यक्ष निर्वाचन प्रणालीबाट १६५ जना तथा समानुपातिक निर्वाचन प्रणालीबाट ११० जना सदस्य निर्वाचित हुने संवैधानिक व्यवस्था छ। समानुपातिकतर्फको उम्मेदवारी फिर्ताको प्रक्रियापछि अन्तिम नामावली सार्वजनिक गरिने निर्वाचन आयोगले जनाएको छ।