त्रिशूली नदी किनारमा भेटिएको बसको आज पनि उत्खनन जारी

चितवन : तनहुँको आबुँखैरेनी गाउँपालिका–५ अन्तर्गत दुन्द्राङबेँसीस्थित त्रिशूली नदी किनारमा फेला परेको बसको आज पनि उत्खनन कार्य गरिने भएको छ। नारायणगढ–मुग्लिन सडकखण्डमा पहिरोका कारण बगेर त्रिशूली नदीमा खसेको आशंका गरिएको बसको अवशेष आइतबार फेला परेपछि उत्खनन सुरु गरिएको हो।

नेपाल प्रहरी र सशस्त्र प्रहरी बलको संयुक्त टोलीले आइतबार दिनभर उत्खनन कार्य गरेको थियो। बसको केही भाग माटो र ढुंगाले पुरिएको अवस्थामा भेटिएपछि थप पुष्टि तथा विवरण संकलनका लागि आज पनि उत्खनन कार्यलाई निरन्तरता दिइने जिल्ला प्रहरी कार्यालय तनहुँले जनाएको छ।

जिल्ला प्रहरी कार्यालय तनहुँका अनुसार आइतबार बिहान करिब १० बजेर ४५ मिनेटको समयमा त्रिशूली नदी किनारमा एउटा बसको अगाडिको भाग जस्तो देखिने संरचना माटोमा पुरिएको अवस्थामा फेला परेको थियो। प्रारम्भिक अध्ययनका आधारमा उक्त बस विसं २०८१ असार २८ गते चितवनको भरतपुर महानगरपालिका–२९ अन्तर्गत सिमलताल क्षेत्रमा काठमाडौँबाट गौरतर्फ जाँदै गर्दा पहिरोले बगाएको बागमती प्रदेश ०३–००१ ख २४९५ नम्बरको ‘गणपति डिलक्स’ बस हुन सक्ने आशंका गरिएको छ।

जिल्ला प्रहरी कार्यालय तनहुँका प्रहरी नायब उपरीक्षक श्रवणकुमार विकका अनुसार घटनास्थलमा देखिएको बस पूर्ण रूपमा पहिचान भइसकेको छैन। बसको थप भाग उत्खनन गरेपछि मात्र यकिन गर्न सकिने उनले बताए।

सूचना प्राप्त हुनासाथ इलाका प्रहरी कार्यालय साराङघाटबाट प्रहरी नायब निरीक्षकको नेतृत्वमा दुई जनाको टोली तथा इलाका प्रहरी कार्यालय आबुँखैरेनीबाट प्रहरी निरीक्षकको नेतृत्वमा १२ जनाको टोली घटनास्थलमा खटिएको थियो। सुरक्षाकर्मीहरूले आवश्यक सुरक्षा व्यवस्था मिलाउँदै सावधानीपूर्वक उत्खनन कार्य गरिरहेका छन्।

हाल बस नदी किनारमै पुरिएको अवस्थामा रहेको र केही भाग मात्र बाहिर देखिएको प्रहरीले जनाएको छ। बससँग सम्बन्धित थप प्रमाण, यात्रु तथा सम्भावित क्षतिको विवरण पत्ता लगाउन उत्खननसँगै अनुसन्धान कार्य पनि जारी रहेको जिल्ला प्रहरी कार्यालय तनहुँले जानकारी दिएको छ।

उक्त घटनाले पुनः नारायणगढ–मुग्लिन सडकखण्डको जोखिमपूर्ण अवस्थालाई उजागर गरेको भन्दै स्थानीयवासीले वर्षायाममा विशेष सतर्कता र दीर्घकालीन समाधानको आवश्यकता औंल्याएका छन्।