बौद्ध दर्शन, अनुसन्धान र सामाजिक सेवामा सक्रिय कृष्ण लामा

चितवन । अध्ययन, अनुसन्धान, सामाजिक सेवा तथा बौद्ध शिक्षाको क्षेत्रमा लामो समयदेखि सक्रिय कृष्ण लामा एक समर्पित र प्रेरणादायी व्यक्तित्वका रूपमा परिचित हुनुहुन्छ। स्वर्गीय आश बहादुर लामा र मनश्री लामाका आठ सन्तानमध्ये कान्छा पुत्रका रूपमा जन्मिनुभएका उहाँको जन्म तत्कालीन शारदानगर–९, कोईराला डाँडा, चितवनमा भएको हो।

बाल्यकालदेखि नै चितवनमै हुर्कनुभएका लामा हाल भरतपुर महानगरपालिका–१९, नमोबुद्ध टोलमा स्थायी बसोबास गर्दै आउनुभएको छ। पारिवारिक जीवनमा धर्मपत्नी, एक छोरा र एक छोरीसहित सरल र जिम्मेवार जीवनयापन गरिरहनुभएको छ।

शैक्षिक यात्रामा उहाँले श्री किरण निम्न माध्यमिक विद्यालयबाट आधार शिक्षा हासिल गर्नुभएको हो भने श्री नारायणी विद्या मन्दिर माध्यमिक विद्यालय, शिवनगरबाट एस.एल.सी. उत्तीर्ण गर्नुभएको थियो। २०४९ सालको एस.एल.सी. परीक्षामा प्रथम श्रेणीमा सफल हुनुभएका उहाँले समाजशास्त्र तथा मानवशास्त्रमा स्नातकोत्तर उपाधि हासिल गर्नुभएको छ।

बौद्ध दर्शनप्रतिको गहिरो रुचिका कारण उहाँले लुम्बिनी बौद्ध विश्वविद्यालयबाट बौद्ध दर्शन विषयमा स्नातकोत्तर तह पूरा गर्नुभएको छ। हाल उहाँ बौद्ध दर्शनसँग सम्बन्धित अनुसन्धान, शोध–पत्र तथा लेख–लेखनमा सक्रिय रहँदै आउनुभएको छ र यही विषयमा विद्यावारिधि अध्ययन गर्ने लक्ष्यसहित अघि बढिरहनुभएको छ।

व्यवहारिक रूपमा उहाँले सामाजिक तथा वातावरणीय अनुसन्धान संस्था, नेपालमा अनुसन्धान अधिकृतको जिम्मेवारी सम्हाल्दै करिब १५ वर्षसम्म अमेरिकाका १० भन्दा बढी विश्वविद्यालयहरूसँग सहकार्य गरी विभिन्न अनुसन्धान कार्यक्रममा संलग्न रहनुभएको छ। यस क्रममा उहाँले अन्तर्राष्ट्रिय स्तरका तालिम तथा अनुभव आर्जन गर्नुभएको छ।

सामाजिक नेतृत्वतर्फ पनि सक्रिय लामा सन् २०२०/०२१ मा लायन्स क्लब अफ नारायणी सेन्ट्रलको अध्यक्षका रूपमा कार्यरत रहनुभयो। हाल उहाँ सम्बोलिङ बौद्ध गुम्बा, भरतपुर–२०, नयाँबजारका अध्यक्षका रूपमा कार्यरत हुनुहुन्छ। उहाँकै नेतृत्वमा निर्माणाधीन तीनतले नयाँ गुम्बाको निर्माण कार्य अन्तिम चरणमा पुगेको छ।

बौद्ध दर्शनलाई व्यवहारिक र मानव उपयोगी शिक्षाका रूपमा समाजमा फैलाउने उद्देश्यका साथ उहाँले चितवन गुम्बा महासमिति गठन गरी विभिन्न गुम्बा, विहार तथा समुदायमा बौद्ध शिक्षा अभिमुखीकरण कार्यक्रम सञ्चालन गर्दै आउनुभएको छ। साथै, उच्च शिक्षा अध्ययन गर्न चाहने विद्यार्थीहरूलाई शैक्षिक परामर्श सेवा प्रदान गर्दै आउनुभएको छ।

बौद्ध दर्शन, अनुसन्धान र सामाजिक सेवाको संगमका रूपमा परिचित कृष्ण लामा वर्तमान समयका एक सक्रिय, विश्वासिलो र प्रेरणादायी व्यक्तित्व हुनुहुन्छ।