नेकपाद्वारा रेनु दाहाल चितवन–३ बाट संघीय निर्वाचनका लागि सर्वसम्मत उम्मेदवार सिफारिस

नेपाली कम्युनिस्ट पार्टी (नेकपा) ले भरतपुर महानगरपालिकाकी प्रमुख रेनु दाहाललाई चितवन निर्वाचन क्षेत्र नं. ३ बाट आगामी संघीय निर्वाचनका लागि सर्वसम्मत रूपमा उम्मेदवार सिफारिस गरेको छ।

पार्टीको चितवन निर्वाचन क्षेत्र नं. ३ अन्तर्गत जगतपुरमा सम्पन्न बैठकले दाहाललाई प्रत्यक्षतर्फको उम्मेदवारका रूपमा सर्वसम्मत सिफारिस गरेको हो। बैठकमा सहभागी नेताहरूले भरतपुर महानगरपालिकाको मेयरका रूपमा दाहालले पूर्वाधार विकास, स्वास्थ्य, शिक्षा तथा सेवा प्रवाहका क्षेत्रमा पुर्‍याएको योगदानलाई उल्लेखनीय उपलब्धिका रूपमा मूल्याङ्कन गरेका छन्।

सर्वसम्मत उम्मेदवार सिफारिस बैठकमा स्वयं उपस्थित दाहालले भरतपुर महानगरपालिकामा करिब नौ वर्ष काम गरेको अनुभव नै आफ्नो मुख्य शक्ति भएको बताउँदै जनताको अपार माया र विश्वासले आफूलाई थप जिम्मेवार बनाएको उल्लेख गर्नुभयो। भरतपुर र माडी क्षेत्रका जनताबाट सदैव माया र साथ पाउँदै आएको उहाँको भनाइ थियो।

चितवन निर्वाचन क्षेत्र नं. ३ अन्तर्गत माडी नगरपालिकासहित भरतपुर महानगरपालिकाका १९ वटा वडाहरू पर्दछन्। पछिल्लो समय बढ्दो राजनीतिक प्रतिस्पर्धा र चुनौतीका बीच पनि जनताको पक्षमा प्रभावकारी काम गर्दै आएको मूल्याङ्कनका आधारमा दाहाललाई एकल उम्मेदवारका रूपमा सिफारिस गरिएको पार्टी स्रोतले जनाएको छ।