पूर्व–पश्चिम राजमार्गमा ‘सिग्नेचर ब्रिज’ : नारायणीमा निर्माण जारी, तिनाउमा ठेक्का प्रक्रिया सुरु

नेपाल सरकारले पूर्व–पश्चिम राजमार्ग अन्तर्गत नारायणी र तिनाउ दुवै नदीमा ‘सिग्नेचर ब्रिज’ निर्माण गर्ने योजना अघि बढाएको छ। नारायणी नदीमा निर्माण कार्य तीव्र रूपमा चलिरहेको बेला तिनाउ नदीमा अत्याधुनिक पुल निर्माणका लागि सडक विभागले औपचारिक रूपमा ठेक्का आह्वान गरेको छ।

सरकारले चालु आर्थिक वर्षको बजेटमै यी दुबै नदीमा कलात्मक र आधुनिक संरचना भएका ‘सिग्नेचर ब्रिज’ निर्माण गर्ने घोषणा गरेको थियो। नारायणीमा तुँदी कन्स्ट्रक्सन प्रालिले चार वर्षभित्र निर्माण सम्पन्न गर्ने गरी १ अर्ब ६८ करोड ७६ लाख रुपैयाँमा ठेक्का पाएको छ। यसको हेरचाह र अनुगमनको जिम्मेवारी डिभिजन सडक कार्यालय चितवनलाई दिइएको छ।

यस्तै, तिनाउ नदीमा बन्ने सिग्नेचर ब्रिजका लागि सडक विभागको वैदेशिक सहायता महाशाखाले टेन्डर प्रक्रिया अघि बढाएको छ। करिब २ अर्ब ५० करोड रुपैयाँ लागत अनुमान गरिएको २६६ मिटर लामो पुलले हालको पुललाई जोगाउँदै उत्तर र दक्षिणतर्फ २–२ लेन गरी दुईवटा नयाँ पुल थपिनेछ। संरचना आकर्षक, कलात्मक र पर्यटनमैत्री हुने गरी डिजाइन गरिने महाशाखाका सिनियर इन्जिनियर सुरेश पौडेलले जनाएका छन्।

अहिलेको तिनाउ पुल २०३८ सालमा बनेको र अत्यधिक जीर्ण भएको कारण पनि नयाँ पुल अपरिहार्य देखिएको छ। बुटवल–गोरुसिंगे सडक चार तथा छ लेनमा विस्तार भइरहेकाले भविष्यमै सवारी चाप व्यवस्थापनमा यो पुल महत्वपूर्ण आधार बन्नेछ। पुल बनेपछि जीतगढी किल्ला, मणिमुकुन्द पार्क जस्ता नजिकका पर्यटन गन्तव्यसमेत थप आकर्षणको केन्द्र बन्ने अपेक्षा गरिएको बुटवल–गोरुसिंगे परियोजना प्रमुख इन्जिनियर कुशलता न्यौपाने बताउँछिन्।

तिनाउ पुलको डिजाइन अन्तर्राष्ट्रियस्तरको छ—आर्किटेक्ट डिजाइन भारतको ‘टोटल सिनर्जी कन्सल्टिङ’ ले र स्ट्रक्चर डिजाइन स्विस सरकारको स्विस डेभलपमेन्ट को–अपरेसनले तयार पारेका छन्। विश्वका प्रमुख सहरहरूमा प्रचलित आधुनिक सिग्नेचर ब्रिज जस्तै रूपरंग यस पुलमा पनि समेटिनेछ।

विभागका अनुसार ठेक्का प्रक्रिया करिब दुई महिनामा सकिने, त्यसपछि सात महिनाको डिजाइन अवधि र झण्डै तीन वर्षमा निर्माण पूरा गर्ने लक्ष्य राखिएको छ। बुटवल–गोरुसिंगेसम्मको ५० किलोमिटर सडक स्तरोन्नति भइरहेकै समय फराकिलो, सुरक्षित र सौन्दर्ययुक्त पुल निर्माणले प्रदेश तथा राष्ट्रिय यातायात संरचनामा महत्वपूर्ण सुधार ल्याउने अपेक्षा गरिएको छ।