लुम्बिनी र जनकपुर आज निर्णायक भिडन्त

काठमाडौंको कीर्तिपुरस्थित त्रिवि क्रिकेट मैदानमा जारी सिद्धार्थ बैंक नेपाल प्रिमियर लिग (एनपीएल) क्रिकेटअन्तर्गत आज लुम्बिनी लायन्स र जनकपुर बोल्ट्स भिड्दै छन्। खेल अपराह्न ४ बजे सुरु हुनेछ।

६ खेलबाट ६ अंक जोडेको लुम्बिनीका लागि आजको मुकाबला अत्यन्तै महत्वपूर्ण मानिएको छ। लुम्बिनीले जीत हात पार्न सके प्लेअफको दहलीज पार्ने मात्र होइन, पोखरा एभेन्जर्स, चितवन राइनोज र जनकपुर बोल्ट्स प्लेअफ दौडबाहिरिनेछन्।

साविक विजेता जनकपुर बोल्ट्स भने यो सिजन संघर्षमै छ। पाँच खेलबाट केवल २ अंक जोड्न सकेको जनकपुरलाई लिगअन्तर्गत बाँकी खेलहरू जितेर मात्र प्रतिष्ठा जोगाउने अवसर छ।

यसअघि बिहीबारको खेलमा शाहब आलमको ह्याट्रिकसहित ६ विकेटको घातक बलिङ प्रदर्शनमा काठमाडौं गोर्खाजले पोखरा एभेन्जर्सलाई हराउँदै प्लेअफ टिकट सुनिश्चित गरेको थियो।

यता, लिग चरणमै उत्कृष्ट प्रदर्शन गरिरहेको सुदूरपश्चिम रोयल्स लगातार ६ खेल जित्दै शीर्षस्थान सुरक्षित गर्दै पहिलो क्वालिफायर खेल्ने पक्का गरिसकेको छ।

आजको लुम्बिनी–जनकपुर भिडन्तले प्लेअफ समीकरणमा ठूलो प्रभाव पार्ने भएकाले प्रतियोगिताको रोमाञ्च झनै बढेको छ।