इजरायलमा मारिएका विपिन जोशीको शव काठमाडौं आइरहेको छ

इजरायलमा हमासको आक्रमणमा मारिएका कञ्चनपुरका विपिन जोशीको शव भोलि सोमबार काठमाडौं ल्याइँदैछ।

परराष्ट्र मन्त्रालयका अनुसार उनको शव फ्लाई दुबईको विमानमार्फत दिउँसो त्रिभुवन अन्तर्राष्ट्रिय विमानस्थलमा अवतरण गर्ने तालिका छ। विपिनप्रति श्रद्धाञ्जली अर्पण गर्नका लागि प्रधानमन्त्री, सम्बन्धित मन्त्रीहरू तथा परराष्ट्र मन्त्रालयका उच्च अधिकारीहरू विमानस्थलमै उपस्थित हुने तयारी गरिएको छ।

विपिन जोशी अध्ययनको सिलसिलामा इजरायल पुगेका थिए। तर, २०२३ अक्टोबर ७ मा हमासले इजरायलको किबुत्ज क्षेत्रमा गरेको भीषण आक्रमणका क्रममा उनी बन्धक बनाइएका थिए। लामो समयसम्म उनको अवस्था अज्ञात रहँदा गत असोज २७ गते इजरायली अधिकारीहरूले उनको मृत्यु भएको पुष्टि गरेका थिए।

इजरायल र हमासबीच हालै भएको युद्धविराम र बन्दी साटासाट सम्झौतापछि हमासले विपिनको शव इजरायली सेनालाई हस्तान्तरण गरेको थियो। डीएनए परीक्षणपछि उक्त शव विपिनकै भएको पुष्टि भएको हो।

इजरायलस्थित नेपाली दूतावासका अधिकारीहरूका अनुसार फरेन्सिक परीक्षणबाट विपिनको अपहरण भएताकै मृत्यु भएको प्रमाणित भएको छ।

कञ्चनपुरका विपिन जोशीको निधनले देशभरका नेपालीहरूलाई गहिरो दुःखमा पारेको छ। सरकारले उनको परिवारलाई आवश्यक सहयोग र सम्मानजनक अन्त्येष्टि व्यवस्थाका लागि पहल गरिरहेको जनाएको छ।