चितवनबाट काठमाडौँका लागि हवाई यात्रुको भीडका कारण विमानस्थल बाट बससेवा सुरु

चितवन — हवाई यात्रुको अत्यधिक चापका कारण स्थानीय प्रशासनको पहलमा भरतपुर विमानस्थलबाट नै काठमाडौँका लागि बससेवा सुरु गरिएको छ।

शनिबारको हवाई सेवा अवरुद्ध भएपछि सो दिनका लागि टिकट लिएका र आइतबार पुनः विमानस्थल पुगेका यात्रुहरूको भीड अत्यधिक बढेपछि प्रशासनले वैकल्पिक व्यवस्था मिलाएको हो। सडक मार्ग पनि केही समयका लागि अवरुद्ध हुँदा यात्रुहरू विमानस्थलमै अलपत्र परेका थिए।

प्रमुख जिल्ला अधिकारी गणेश अर्यालले स्वयं विमानस्थल पुगेर अवस्थाको अवलोकन गरेपछि यातायात व्यवसायीसँग समन्वय गरी यात्रुलाई बसमार्फत काठमाडौँ पठाउने व्यवस्था मिलाएका हुन्। प्रारम्भिक चरणमा एक माइक्रोबसले यात्रु लिएर पठाइएको र थप बसको व्यवस्था भइरहेको उनले जानकारी दिए।

उनका अनुसार, “यातायात व्यवसायीलाई नियमानुसारको भाडा यात्रुसँग लिएर सेवा दिन आग्रह गरेका छौं। अत्यावश्यक यात्रुहरूलाई शीघ्र काठमाडौँ पठाउनका लागि प्रशासनले औपचारिक पत्र बनाएर बस पठाएको हो।”

बसलाई सहज रूपमा आउन–जान सघाउन प्रशासनले आवश्यक पत्राचारसमेत गरेको छ। नारायणगढ–मुग्लिन सडकखण्ड सञ्चालनमा रहेको र पृथ्वी राजमार्गको चितवन खण्ड खुला रहेको जानकारी दिँदै प्रमुख जिल्ला अधिकारी अर्यालले धादिङ क्षेत्रमा खसेको पहिरो पन्छ्याउने कार्य अन्तिम चरणमा पुगेको बताए।

यसअघि, शनिबार हवाई सेवा अवरुद्ध हुँदा अलपत्र परेका यात्रुका लागि प्रशासनले ७५ प्रतिशत छुटमा होटलमा बस्ने व्यवस्था गरेको थियो।