चितवन, राजस्व कार्यालयले नयाँ दर्ता भएका करदातालाई करसम्बन्धी शिक्षा दिन सुरु

चितवन, आन्तरिक राजस्व कार्यालयले नयाँ दर्ता भएका करदातालाई करसम्बन्धी शिक्षा दिन थालेको छ। कार्यालयले चालु आर्थिक वर्षदेखि व्यवसायीलाई आयकर, अन्तशुल्क तथा मूल्य अभिवृद्धि कर (भ्याट)का बारेमा विस्तृत जानकारी दिने कार्यक्रम सुरु गरेको हो।

कार्यालयका प्रमुख पुण्यविक्रम खड्काका अनुसार आर्थिक ऐन २०८२ का नयाँ व्यवस्था कार्यान्वयन गर्न व्यवसायीलाई सचेत बनाउन शिक्षा कार्यक्रम थालिएको हो। उनले भने, “व्यवसायीलाई बिल–बिजकको अनिवार्य प्रयोग, करसम्बन्धी पोर्टल सञ्चालन लगायतका विषयमा व्यवहारिक प्रशिक्षण दिइएको छ।”

गत आर्थिक वर्षमा मात्र कार्यालयमा दुई हजार ३२५ व्यवसाय दर्ता भएका थिए भने चालु आवको पहिलो महिनामै ३५७ नयाँ व्यवसाय दर्ता भएका छन्। यस अवधिमा रु १५ लाख ३३ हजार ९११ राजस्व सङ्कलन भएको छ। यस्तै, गत आर्थिक वर्षमा कार्यालयमार्फत करिब रु २५ अर्ब नौ करोड सात लाख ३२ हजार राजस्व संकलन भएको थियो।

कर कार्यालयले नयाँ व्यवसायीलाई करसम्बन्धी शिक्षा दिनुबाट कर प्रणालीप्रति विश्वास बढ्ने र स्वेच्छिक कर भुक्तानीमा सहयोग पुग्ने अपेक्षा गरिएको छ।