पसल फोड्दै शृंखलाबद्ध रूपमा मोबाइल चोरीमा संलग्न तीन पक्राउ

विराटनगर- शृंखलाबद्ध रूपमा पसल फोडेर मोबाइल चोरीमा संलग्न तीन जनालाई प्रहरीले पक्राउ गरेको छ।

पक्राउ पर्नेमा विराटनगर महानगरपालिका-११ का २६ वर्षीय रोशनकुमार मण्डल, धनपालथान गाउँपालिका-७ का २२ वर्षीय विशालकुमार सिंह र भारत अररियाका १८ वर्षीय कृष पासवान रहेका छन्।

उनीहरूलाई जिल्लाका विभिन्न ठाउँबाट पक्राउ गरिएको मोरङ प्रहरी प्रमुख प्रहरी उपरीक्षक नारायण चिमरियाले बताए।

विराटनगरका दक्षिणी क्षेत्रमा चोरी बढ्दै गएपछि प्रहरीले यस्तो कार्यमा संलग्नको खोजी थालेको थियो। कटहरी गाउँपालिका-४ नयाँबजारको राज मोबाइल केयर पसलमा गत वैशाख ११ गते चोरी भएपछि प्रहरीमा उजुरी परेको थियो।

चिमरियाका अनुसार उनको पसलबाट ल्यापटप, एन्ड्रोइड मोबाइल, सादा मोबाइल र मर्मत गर्न ल्याइएका मोबाइलहरू चोरी भएका थिए।

धनपालथानका सिंहलाई प्रहरीले जेठ २७ गते पक्राउ गरेको थियो। जिल्ला प्रहहरी कार्यालय मोरङमा ल्याएर अनुसन्धान गर्दा मण्ठल र भारतीय नागरिक पासवानसम्म प्रहरी पुगेको थियो।

चोरी गरेका मोबाइल मण्डलको कोठामा राख्ने गरेको खुलेको छ। मण्डलको कोठाभित्र लुकाएका नयाँ तथा पुराना मोबाइल सेट बरामद भएका छन्।

‘चोरी कार्यमा प्रयोग हुने औजारहरू (ड्रिल मेशिन, हथौडा, रड, पेच कस, पिलास लगायत) फेला परेका छन्,’ चिमरियाले भने। पासवान मण्डलसँगै कोठामा बस्थे।

उनीहरूको साथबाट ८ वटा सादा सेट, एन्ड्रोइड मोबाइल सेट २१ थान, बिग्रिएका मोबाइल ५१ थान, ल्यापटपको ब्याट्री १ थान, मोबाइलका डिप्ले १३ थान र चोरीमा प्रयोग हुने औजार ९ थान बरामद भएको छ।

पक्राउ परेकाहरूलाई चोरी मुद्दामा अदालतबाट थुनामा राख्ने अनुमति लिई अनुसन्धान भइरहेको छ।