“जाने हैन त…?” को क्रेज: सडकदेखि फेसबुकसम्म सोधिन्छ एउटै प्रश्न!

चितवन , बैशाख २५ –
“जाने हैन त…?” – एक सामान्य सोधाइ। तर आजभोलि यही वाक्य नेपाली समाजको एउटा ट्रेन्ड बनेको छ। फर्केर हेर्दा, कुनै बेला यो प्रश्न मात्र गाडीका सहचालकले स्टेसन नजिक सडकमा उभिएका यात्रुहरूलाई झुन्डिएर सोध्ने कुरा थियो। अब भने यसले आफ्नो सिमाना फैलाउँदै फेसबुकका वालदेखि टिकटकसम्म पुगेको छ।
“जाने हैन त जापान ? अमेरिका? क्यानडा? अस्ट्रेलिया? IELTS 6 भए पुग्छ!” भनेर अब गाडीका सहचालक होइन, सिधै कन्सल्टेन्सीका साहुजीहरू फेसबुक रीलमा देखिन थालेका छन्। गाडीभन्दा तीव्र गतिमा जानकारी प्रवाह भइरहेको छ—तर प्रश्न उही छ: जाने हैन त?
यसबिच, कतिपयले त यो ‘जाने हैन त’ लाई जीवनको मूल मन्त्रजस्तै लिएका छन्। गन्तव्य फरक होलान् — कोही विदेशतिर, कोही काठमाडौंतिर, कोही सिधै TikTok live मा — तर लाग्ने सोच एउटै छ: बस, कतै न कतै जानु छ।
सामाजिक सञ्जालमा यो ट्रेन्डले ठुलो चर्चा पाएको छ। कतिले त यसलाई व्यंग्य बनाएर ‘जाने हैन त?’ टिशर्टदेखि मिमसम्म बनाएका छन्। अनि हो, बजारमा ‘जाने हैन त?’ लेखिएको कफी मग र मोबाइल कभर पनि आउन थालेको छ।
सन्देश चाहिं एकदमै प्रस्ट छ — सोध्ने तरिका फरक हो, तर सबलाई चाहिएको कुरा एउटै हो: “तिमी जान चाहन्छौ कि छैनौ?”
अन्त्यमा, एक सामाजिक विश्लेषक भन्छन् — “देश हिँडेको छैन, मान्छे हिँडिरहेका छन्। अनि हरेक मोडमा उस्तै प्रश्न आइरहेको छ — जाने हैन त?”