हामीले शिक्षामा फड्को मारेका छौँ : मेयर दाहाल

चितवन : भरतपुर महानगर प्रमुख रेनु दाहालले भरतपुरले शिक्षामा फड्को मारेको बताएकी छन् । शरदपुर माध्यमिक विद्यालयको स्वर्ण महोत्सव समुदघाटन समारोहलाई सम्बोधन गर्दै उनले यस्तो बताएकी हुन् । ‘शैक्षिक सेवामा ५० वर्ष पूरा गर्नु चानचुने कुरा होइन’ उनले भनिन्, ‘हामीले शिक्षामा फड्को मारेका छौँ । प्रविधिमैत्री शिक्षामा जोड दिएका छौँ ।’ मेयर दाहालले शरदपुर माध्यमिक विद्यालयको नतिजा, विद्यार्थी संख्या र विद्यालयको अवस्था सन्तोषजनक रहेको बताइन् ।

विद्यार्थीहरुलाई पढाईमा मात्र नभई अतिरिक्त कृयाकलापमा पनि सहभागी गराउनु पर्ने बताउँदै मेयर दाहालले छिट्टै नै राष्ट्रपति रनिङ शिल्ड खेलकुद प्रतियोगिताको आयोजना गर्न लागिएको जानकारी गराइन् । ‘त्यहाँ पनि विद्यार्थी भाइबहिनीहरुको सहभागिता रहने छ’ उनले भनिन्, ‘महानगरपालिकाका सबै सामुदायिक र संस्थगत विद्यालयका विद्यार्थी भाइबहिनीहरुलाई अवसर दिनका लागि प्रतियोगिताको आयोजना गर्न लागिएको हो ।’

व्यावहारिक शुक्रबार भनेर विद्यार्थीहरुलाई विद्यालयमा व्यावहारिक ज्ञान दिने नैतिक ज्ञान दिने काम भइरहेको मेयर दाहालको भनाइ थियो । उनले दरबन्दीको समस्या समाधानका लागि महानगरपालिकाले आफ्नै स्रोतबाट एक कक्षा, एक शिक्षकको अवधारणामा काम गरिरहेको जानकारी दिइन् । समुद्घाटन समारोहमा विद्यालयको उन्नतिमा योगदान दिने विभिन्न महानुभावहरुलाई सम्मान गरिएको थियो । विद्यालय व्यवस्थापन समितिका अध्यक्ष जगन्नाथ कँडेलको अध्यक्षतामा सम्पन्न कार्यक्रममा विद्यार्थीहरुले गीत र नृत्यसमेत प्रस्तुत गरेका थिए ।