चेपाङ सङ्घद्धारा चेपाङ सहिद परिवारलाई सम्मान

इच्छाकामना : चेपाङ सहिद परिवारलाई सम्मान गरिएको छ । नेपाल चेपाङ संघ केन्द्रिय समितिले चितवनको इच्छाकामना गाउँपालिका २ हपनीका चेपाङ जातीको पहिलो सहिद सन्त बहादुर चेपाङ र दशरथ चेपाङका परिवारलाई सहिद दिवसको अवसरमा बिहिबार सम्मान गरिएको हो ।
हपनीमानै पुगेर सहिद दशरथ चेपाङको जेठो छोरा किष्ट बहादुर चेपाङ र माइलो छोरा सुक्र बहादुर चेपाङ र अर्का सहिद सन्त बहादुर चेपाङका छोरा अकिल चेपाङलाई एक कार्यक्रमकाबिच दोसल्ला ओढाएर र सम्मानपत्र सहित सम्मान गरिएको नेपाल चेपाङ सङ्घका केन्द्रिय अध्यक्ष गोविन्दराम चेपाङले जानकारी दिनुभयो ।
बागमती प्रदेशका वन तथा वातावरणमन्त्री कृष्णप्रसाद सिलवाल, गाउँपालिका अध्यक्ष दान बहादुर गुरुङ, वडाध्यक्ष पञ्च बहादुर चेपाङ लगायत चेपाङ समुदायका अगुवाहरुको उपस्थितिमा सम्मान गरिएको उहाँले बताउनुभयो ।
राजपत्रमा उल्लेख भएअनुसार सन्तबहादुर र दशरथको साहदत वि.स. २०३४ साल असार ७ गते भएको हो । पञ्चायतकाल विरुद्ध चितवनको जुगेडीमा भएको संघर्षमा सामेल हुँदा उहाँहरु सहिद हुनुभएको थियो । लोकतान्त्रिक गणतन्त्र घोषणा पश्चात दुबै जनालाई सहिद घोषणा गर्ने निर्णय सरकारले २०६५ सालको पुस ९ मा गरेको राजपत्रमा विवरण छ ।दशरथ चेपाङ र सन्त बहादुर चेपाङलाई सहिद घोषणा गरेपनि राज्यले उहाँहरुको परिवारको शिक्षा स्वास्थ्य लगायत पालनपोषणमा सहयोग नगरेको बताउनुभयो । सहिद परिवारहरुको आर्थिक अवस्था कमजोर भएकाले राज्यले तत्काल सहयोग गर्न आवश्यक रहेको उहाँको भनाई छ । साथै चेपाङ सहिदको सम्मानका लागि फिस्लिङ– शक्तिखोर सडकलाई चेपाङ सहिद मार्ग राख्नुपर्ने चेपाङ सङ्घको माग रहेको पनि उहाँले बताउनुभयो ।
सो अवसरमा वागमती प्रदेशसका वन तथा वातावरणमन्त्री कृष्णप्रसाद सिलवालले सहिदको परिवारका लागि प्रदेश सरकारले सहयोग गर्ने प्रतिवद्धता जनाएको बताउनुभयो । साथै गाउँपालिका अध्यक्ष दान बहादुर गुरुङले पनि गाउँपालिकाले आवश्यक सहयोग गर्ने प्रविद्धता जनाउनुभएको थियो ।