लिटिल फ्लावर स्कुलमा “वडाअध्यक्षसँग विद्यार्थी” शीर्षकको विशेष अन्तरसंवाद कार्यक्रम सम्पन्न

भरतपुर महानगरपालिका वडा नं. ३ ले आइतबार लिटिल फ्लावर स्कुलमा “वडाअध्यक्षसँग विद्यार्थी” शीर्षकको विशेष अन्तरसंवाद कार्यक्रम सम्पन्न गरेको छ। कार्यक्रमको मुख्य आकर्षण वडाअध्यक्ष विकास थापाको प्रेरणादायक मन्तव्य थियो। उहाँले जनप्रतिनिधि र नागरिकबीचको सम्बन्ध नङ र मासुको जस्तो घनिष्ठ हुनुपर्ने उल्लेख गर्दै, वडाबाट प्रदान गरिने सेवा सुविधाले नागरिकको जीवनमा सहजता ल्याएको जानकारी दिनुभयो।

कार्यक्रममा वडाका विभिन्न विद्यालयका करिब ४०० विद्यार्थी, शिक्षक, र वडा सदस्यहरूको सहभागिता रहेको थियो। वडाअध्यक्ष थापाले जन्मदर्ता, मृत्यु दर्ता, विवाह दर्ता जस्ता सेवाहरू वडा कार्यालयमै उपलब्ध भएकाले नागरिकको समय र श्रम बचत भएको उल्लेख गर्नुभयो।

वडा सदस्य सुकमाया परियारले विद्यार्थीहरूसँग प्रत्यक्ष संवाद गर्न पाउँदा खुसी लागेको बताउँदै सरसफाइ र विकासका काम निरन्तर जारी रहने विश्वास व्यक्त गर्नुभयो। अर्का सदस्य कमला बोलखेले यस्ता कार्यक्रम वार्षिक रूपमा आयोजना गर्नुपर्ने सुझाव दिनुभयो भने वडा सदस्य राम लोहनीले विद्यार्थीको सुझावलाई प्राथमिकतामा राख्दै यस्ता कार्यक्रमलाई निरन्तरता दिने धारणा राख्नुभयो।

कार्यक्रममा विद्यार्थीहरूले वातावरण, सरसफाइ, र वडाले दिने सेवाहरूका सम्बन्धमा जिज्ञासा राखेका थिए। वडा सचिव माधव सुवेदीले वडाबाट प्रदान गरिने सेवाहरूको जानकारी दिएका थिए।

लिटिल फ्लावर स्कुलका प्रिन्सिपल फादर मन्जुस एसजेले यस्ता कार्यक्रमले विद्यार्थीहरूमा स्थानीय शासनप्रति विश्वास बढाउने बताउनुभयो। पत्रकार तथा प्राध्यापक मधुसुदन दवाडीले विद्यार्थी र जनप्रतिनिधिबीचको संवादबाट नयाँ दृष्टिकोण प्राप्त हुने विश्वास व्यक्त गर्नुभयो।

कार्यक्रमको व्यवस्थापन दर्शन मिडिया प्रा.लि.ले गरेको हो। कार्यक्रमको संचालन पत्रकार अजिता अधिकारीले गर्नुभएको थियो भने कार्यक्रम सफल बनाउन वडा नं. ३ को कार्यालयले आर्थिक सहयोग गरेको थियो।