माघ २२ देखि किशोरीहरूका लागि पाठेघरको मुखको क्यान्सर नियन्त्रण खोप अभियान सुरु – मन्त्री पौडेल

काठमाडौँ, स्वास्थ्य तथा जनसंख्या मन्त्री प्रदीप पौडेलले नेपाल पाठेघरको मुखको क्यान्सर नियन्त्रणका लागि दृढ प्रतिबद्धता जनाउँदै, आगामी माघ २२ गतेदेखि दुई सातासम्म किशोरीहरूका लागि देशव्यापी खोप अभियान सञ्चालन हुने जानकारी दिनुभएको छ।

इन्डोनेसियाको बालीमा आयोजित गाभी (वैश्विक खोप सहकार्य) को बैठकलाई सम्बोधन गर्दै मन्त्री पौडेलले यो खोप अभियान केवल नेपालका लागि मात्र नभई, सर्भाइकल क्यान्सर अन्त्यको वैश्विक रणनीतिमा महत्वपूर्ण उपलब्धि हुने उल्लेख गर्नुभएको छ।

मन्त्री पौडेलका अनुसार, गाभीसँगको सहकार्यमा नेपालले खोपलक्षित प्राथमिकता तय गरेको छ। राष्ट्रिय खोप कार्यक्रमलाई सुदृढ पार्दै, नेपालले हेपाटाइटिस बी र हैजाका विरुद्ध खोप कार्यक्रम ल्याउने योजना बनाएको छ। “हामी यसबारे विस्तृत रूपमा छलफल गरिरहेका छौँ, र चाँडै औपचारिक अनुरोध गर्ने तयारीमा छौँ,” उहाँले बताउनुभयो।

नेपालमा खोप कार्यक्रम कार्यान्वयन गर्दा बजेटको अभाव र नयाँ संघीय संरचनामा जनशक्तिको अभावजस्ता चुनौती रहेको मन्त्री पौडेलले स्वीकार्नुभयो। उहाँले स्वास्थ्य क्षेत्रमा सुदृढीकरण र खोप पहुँचका लागि अन्तर्राष्ट्रिय समुदायसँग सहकार्यको अपेक्षा रहेको बताउनुभयो।

“कोही पनि खोप अभियानबाट बञ्चित हुनुहुँदैन,” मन्त्री पौडेलले जोड दिनुभयो। उहाँका अनुसार, विश्वव्यापी खोप अभियानसँगको साझेदारीले नेपाल र अन्य विकासोन्मुख देशका लागि खोपहरूको पहुँच र सुलभता सुनिश्चित गर्न महत्वपूर्ण योगदान पुर्‍याउनेछ।

यो अभियानले नेपाललाई पाठेघरको मुखको क्यान्सर नियन्त्रणमा मात्र नभई, स्वास्थ्य सेवा सुदृढीकरणको यात्रामा समेत अग्रगामी बनाउने विश्वास लिइएको छ।