बागलुङ दुर्घटना: पाँच जनाको मृत्यु, एक जना घाइते

बागलुङको जैमिनी नगरपालिका–८ छिस्तीबाट बागलुङ बजारतर्फ जाँदै गरेको पिकअप भ्यान दुर्घटना हुँदा पाँच जनाको मृत्यु भएको छ।

ग२च ९२४७ नम्बरको पिकअप भ्यान जैमिनी–७ जैदी र छिस्तीको सिमानामा व्यार्थला नजिकै दुर्घटनामा परेको हो। जिल्ला प्रहरी कार्यालयका सूचना अधिकारी प्रहरी निरीक्षक केशव थापाका अनुसार दुर्घटनामा पाँच जनाको ज्यान गएको छ।

मृत्यु हुनेमा ३८ वर्षीय चालक महेन्द्र पुन, २० वर्षीया रश्मी श्रीष, ५० वर्षीया नन्दकली पुन, १७ वर्षीय निरज श्रीष र ७५ वर्षीय कुलप्रसाद श्रीष रहेका छन्। भ्यान सडकबाट करिब ५०० मिटर तल खसेको थियो।

दुर्घटनामा ४५ वर्षीय गङ्गाबहादुर श्रीष घाइते भएका छन्। उनलाई उपचारका लागि धौलागिरि अस्पताल लगिँदैछ।