चितवनमा विपद् न्यूनीकरणका लागि नक्साङ्कन गरिँदै

चितवन । जिल्ला विपद् व्यवस्थापन समितिको बिहीबार बसेको बैठकले जिल्लाका सातवटै पालिकाको विपद् जोखिमयुक्त स्थलको नक्साङ्कन गर्ने निर्णय गरेको छ । प्रमुख जिल्ला अधिकारी इन्द्रदेव यादवको अध्यक्षतामा बसेको बैठकले वर्षातको समयमा हुन सक्ने क्षतिका स्थानहरू पहिचान गरी विपद न्यूनीकरणका लागि नक्साङ्कन गर्ने निर्णय गरेको हो । यस विषयको प्रतिवेदन नेपाल प्रहरीले बुझाउने निर्णय भएको छ ।

स्थानीय तहलाई आपतकालीन आश्रय स्थल र खुला स्थानहरू पनि पहिचान गरी जिल्ला प्रशासनमा पठाउनका लागि एक हप्ताको समय दिइएको छ । विपद्को समयमा प्रभावितहरूलाई तत्काल आश्रय प्रदान गर्न र विपद्बाट जोगिनका लागि खुला ठाउँ आवश्यक हुने कारणले स्थान पहिचानको निर्णय गरिएको प्रजिअ यादवले बताउनु भयो ।

नदी तटीय क्षेत्र, पहिरो जोखिम भएको भीर पाखा, डुबान क्षेत्र पहिचान गरी केही स्थानमा सशस्त्र प्रहरीको अस्थायी क्याम्पसमेत खडा गर्ने तयारी भएको छ । विपद्को पूर्वसूचना दिनका लागि सुरक्षा निकायहरू तयारी अवस्थामा रहने र जिल्ला विपद् व्यवस्थापन समितिमा जानकारी गराउने निर्णयसमेत भएको छ । विपद्को समयमा आवश्यक खाद्य र गैर खाद्यवस्तुहरूको व्यवस्थापनमा रेडक्रस, निजी क्षेत्रको सहयोग अपरिहार्य हुने भन्दै प्रजिअ यादवले त्यसको व्यवस्थापन आवश्यक रहेको बताउनु भयो ।

मुग्लिन–नारायणगढ सडक क्षेत्रमा वर्षातकाे समयमा पहिरो जाने जोखिम रहेकाले पूर्वतयारीस्वरुप व्यवस्थापनका सामग्रीहरु तयारी अवस्थामा राखिएको सडक डिभिजन कार्यालय भरतपुरका प्रमुख इन्जिनियर रमेश पौडेलले बताउनु भयो । ‘तीनवटा लोडर र एउटा एक्साभेटर तयारी अवस्थामा छन्, थप सहयोग चाहिएमा अन्य निकायहरूसँग पनि समन्वय गरिन्छ’, प्रमुख पौडेलले भन्नुभयो ।

कार्यक्रममा बोल्नुहुँदै रत्ननगर नगरप्रमुख प्रलाद सापकोटाले विपद्बाट हुने क्षति न्यूनीकरणका लागि पालिकाले भूमिका निर्वाह गर्ने प्रतिबद्धता जनाउनुभयो । खैरहनी नगरप्रमुख शशि खनियाँले जिल्लाका सबै तहलाई उत्तिकै मह¤व दिई समन्वयात्मक वातावरण बनाउन आग्रह गर्नुभयो ।

कालिका नगरप्रमुख विनोद रेग्मीले सम्भावित विपद् जोखिम नियन्त्रणका लागि काम भए पनि सरकारी कार्यालयहरूले सहयोग नगर्दा काम गर्न अप्ठेरो परेको बताउनु भयो । राप्ती नगरप्रमुख शमशेर लामाले जस्तोसुकै विपद् परे पनि सामना गर्ने तरिकाले अघि बढ्नुपर्ने बताउनु भयो ।

बैठकमा बोल्नुहुँदै नेपाली कांग्रेस चितवन सभापति राजेश्वर खनाल, नेकपा एमाले चितवन अध्यक्ष कमल पाठक, माओवादी केन्द्रका चितवन संयोजक रामचन्द्र अधिकारीले विपद्को समयमा आवश्यक पर्ने जनशक्ति व्यवस्थापन गर्ने बताउनु भयो । रास्वपाका सभापति कृष्ण भुसाल, नेकपा समाजवादीका नरेन्द्र कन्दङ्वाले विभिन्न निकाय र तहबिचको समन्वय आवश्यक हुने बताउनु भयो । भरतपुर महानगर विपद् व्यवस्थापन शाखाका प्रमुख बालकृष्ण थपलियाले महानगरका जोखिमयुक्त ठाउँहरू पहिचान गरी सम्भावित जोखिम कम गर्ने गरी काम गरिरहेको बताउनु भयो ।