चितवनमा छठको चहलपहल बढ्यो, नारायणी किनारमा ५० हजार भक्तजन आउने अपेक्षा

निरुता बि क

चितवन, मंसिर २-

चिवनमा छठ पर्वको चहलपहल बढेको छ ।

बजारमा पूजा सामग्री खरिदबिक्रीका साथै नारायणी नदीमा पूजाका लागि घाट सम्याउने, सरसफाइ गर्ने र टेन्ट निर्माण गरिने काम सुरु भएसँगै चहलपहल सुरु भएको हो । चितवनमा अन्य क्षेत्र पदमपुर, टाँडी, पर्सा बजार, भण्डारा, माडीको बसन्तपूरलगायत ठाँउमा छठको पूजाको चहलपहल बढेको छ ।

छठ पूजाका लागि आवश्यक पूजा सामग्री, हरियो तरकारी, फलफूल किन्ने ग्राहकको नारायणगढमा भीड देखिन्छ । खासगरीे छठ पूजामा छठी मातालाई अर्पण गरिने प्रसादमा स्याउ, केरा, सुन्तला, पानीसहितको नरिबल, उखु, मुला, अदुवाको बोटलगायतका फलफूल, हरियो तरकारी, तथा बाँसका सामग्री खरिद गर्नेको ठूलो भीड आज बजारमा देखिएको छ ।

नारायणगढ पुतलीबजार घर भएका न्यू अमर जीत किराना पसलका सञ्चालक कृष्णप्रसाद शाहले बजारमा छठ पूजाका लागि आवश्यक पूजा सामग्री, हरियो तरकारी, फलफूल किन्ने ग्राहकको भीड उल्लेख्य रहेको बताए । उनको पसलमा छठ पूजाका लागि आवश्यक पूजा सामग्री लिनको लागि दैनिक ५०० भन्दा धेरै आउने गरेको बताए । उनले शुक्रबारबाट पूजाका सामग्री बिक्रीबितरण गर्दै आएको जानकारी दिए ।

हरेक वर्ष छठ पर्वको लागि सामग्री लिन आउनेको संख्या बढ्दै गएको उनको भनाइ छ । निष्ठापूर्वक धुमधामसँग मनाइने छठका लागि पूजाको सामग्री किन्ने श्रद्धालुको भीडले रौनकता थपिएको उनले बताए ।

नारायणी नदीमा पूजाका लागि घाट सम्याउने, सरसफाइ गर्ने र टेन्ट निर्माण कार्य भइरहेको तराई सामुदायिक सेवा समिति नारायणगढका सचिव नारदप्रसाद परिहस्तले नारायणी अनलाइनलाई जानकारी दिए । समितिका सचिव परिहस्तका अनुसार यस वर्ष छठ पर्वको चहलपहल बढ्दै गएको छ । उनले गत वर्षको तुलनामा यस वर्ष भक्तजनको संख्या बढ्ने अनुमान गरेका छन् ।

उनले भने, ‘कात्तिक २८ गतेदेखि नै नारायणी नदी किनारमा छठको तयारी थालिएको हो । भरतपुर महानगरबाट प्राविधिक सहयोग र चितवन प्रशासनसँग समन्वय गरी काम गरिरहेका छौँ । भोलि आइतबार १२ बजेभित्र निर्माण कार्य सकिनेछ ।’ चितवन जिल्लामा विसं २०१६ सालदेखि छठ पर्व मनाउँदै आएको उनको भनाइ छ । उनले तराई सामुदायिक सेवा समिति नारायणगढले २०५२ सालदेखि संस्थागत रुपमा छठ पूजा आयोजना गर्दै आएको जानकारी दिए । उनले पूजा गर्नको लागि स्टलसमेत निर्माण गरिएको जानकारी दिए । उनले निःशुल्क स्टलमा बसेर भक्तजनले पूजा पाउने जानकारी दिए ।
उनले चितवनमा विभिन्न समुदायका मानिस बसोबास गर्ने गरेको बताए । उनले भने, ‘यहाँ विभिन्न समुदायका मानिस बसोबास गर्छन् । पहिले पहिले पहाडबाट यहाँ बसाइँ सरी आएको मानिसलाई छठको बारेमा धेरै थाहा थिएन भने अहिले प्राय जसो मानिसलाई छठपर्वको महत्वको बारेमा थाहा छ । युवायुवतीमा छठ पर्वको आकर्षण बढेको छ । जसकारण हरेक वर्ष भक्तजनको संख्या बढ्दो छ ।’
उनका अनुसार नेपालमा सरकारले छठ पर्वमा सार्वजनिक बिदा दिएको कारण पनि छठ पर्व मनाउने भक्तजनको संख्याबढ्दै गएको छ । यहाँ चितवनसहित नवलपरासी, मेघौली, तनहुँ, धादिङबाट व्रतालु छठ मनाउन आउने गरेका छन् । समितिका पूर्वअध्यक्ष राजकुमार कानुले यस वर्ष वर्तालु र सर्दलुको संख्या उल्लेख्य बढ्ने अनुमान गरेका छन् । उनले नारायणी नदी किनारमा पूजा गर्न अहिले ५० हजार भक्तजन आउने अनुमान गरेका छन् । उनले भने, ‘यस वर्ष भक्तजनको संख्या उल्लेख्य बढ्नेअनुमान गरेका छौँ । पूजा गर्न आउने भन्दा पनि हेर्न आउनेको संख्या धेरै हुन्छ ।’

पहिले पहिले तराईबासीले मात्रै मनाउने छठ पछिल्लो समय पहाडी समुदायका मानिसले समेत पूजा गर्ने र हेर्न आउने उनको भनाइ छ । नदी किनारमा पूजाका लागि छुट्टाछुट्टै ठाउँ निर्माण गरिएको छ भने ती स्थानमा सूर्यभगवानका मूर्ति राखिने समितिका पूर्वअध्यक्ष कानुले जानकारी दिए ।