भरतपुर भ्रमण वर्ष २०२४ : सञ्चारकर्मीसँग महानगरको संवाद, तीन लाख पर्यटक भित्र्याउने तयारी

चितवन : भरतपुर महानगरपालिकाले भ्रमण वर्ष २०२४ मा तीन लाख पर्यटक भित्र्याउने गरी काम अगाडि बढाएको जानकारी दिएको छ । भ्रमण वर्ष मनाउने सन्दर्भमा बुधबार आयोजित पत्रकार सम्मेलनमा महानगरका प्रमुख रेनु दाहालले एक वर्षमा कम्तीमा तीन लाख पर्यटक महानगरका पर्यटकीय क्षेत्रमा घुम्न आउने गरी तयारी भएको बताइन् ।

“घुमौँ भरतपुर” नारा दिइएको भरतपुर भ्रमण वर्ष २०२४ लाई सफल पार्न महानगरले सरसफाइ र वृक्षरोपणलगायतका क्रियाकलापलाई अभियानका रुपमा सञ्चालन गरिरहेको महानगरले भ्रमण वर्षलाई लक्षित गरी विभिन्न क्रियाकलापहरु सञ्चालन गरिरहेको छ । महानगरले आज यस सन्दर्भमा सञ्चारकर्मीहरुसँग संवाद गर्दै चाडपर्व विशेष शुभकामना आदानप्रदान कार्यक्रमसमेत गरेको छ । कार्यक्रममा बोल्दै महानगर प्रमुख रेनु दाहालले भनिन्, ‘देश आर्थिकरुपमा सवल नभए पनि भ्रमण वर्षको कारण आर्थिक गतिविधि चलायमान गराउन सफल हुने बताइन् ।

‘आगामी पुस १५ गते भव्यरुपमा उद्घाटन गरेर भ्रमण वर्षको सुरुवात गर्नेछौं’, मेयर दाहालले भनिन्, ‘‘पर्यटन वर्षका लागि महानगरपालिकाले छ करोड रुपियाँ विनियोजन गरी काम गरिरहेको छ ।’ महानगरपालिकाभित्र मात्रै ३१ वटा पर्यटकीय केन्द्र रहेकाले यहाँ आउने पर्यटकले भरपुर मनोरञ्जन र नयाँ स्थानको अनुभव लिने उनले बताइन् ।

चितवन निकुञ्ज, नारायणी नदी देवघाट, क्रुजशिप, दियालो बङ्गलालगायत महानगरको प्रमुख पर्यटकीय क्षेत्र हुन् । मेघौली गोलाघाटको सूर्यास्तसहित विभिन्न दर्जनौं स्थानमा स्वदेशी विदेशी पर्यटक भित्र्याउने गरी तयारी भएको उनको भनाइ छ । उपप्रमुख चित्रसेन अधिकारी, प्रमुख प्रशासकीय अधिकृत नरेन्द्रकुमार रानाले बाँकी रहेको दुई महिनालाई अधिकतम् उपयोग गरेर तयारी पूरा गर्ने जानकारी दिए ।