सरसफाइमा महानगरकै नमुना वडा बन्दै भरतपुर–२३

चितवन : भरतपुर महानगरपालिकाले भरतपुर भ्रमण वर्ष २०२४ को तयारी अन्तिम चरणमा पुर्‍याएको छ । ‘घुमौँ भरतपुर’ भन्ने नारालाई अगाडि सारेर महानगरपालिकाले भ्रमण वर्ष को भव्य तयारी गरिरहेको छ । भ्रमण वर्षको पूर्वसन्ध्यामा वडा नम्बर २३ ले ‘मिसन–२३’ अभियान सुरु गरेको छ ।

वडा न २३ को २३ ठाउँमा २३ दिनसम्म लगातार तीन घण्टाका दरले टोल सुधार समितिलाई सहभागी गराएर समुदायमा जागरणसहित सरसफाइको अभियान थालनी गरिएको वडा कार्यालयले जनाएको छ । अभियानको सोमबार १० औँ दिनको कार्यक्रम कृष्णचोक परिसरमा सम्पन्न गरिएको छ । १० औँ दिनको कार्यक्रमको प्रमुखअतिथि नगर उपप्रमुख चित्रसेन अधिकारी रहेका थिए ।

फोहोर टिप्दै नगर उपप्रमुख अधिकारीले भने, ‘सरसफाइको सवालमा तल्लो तह टोल विकास संस्थाहरु नै गम्भीर हुन आवश्यक छ, यो त वडा नं. २३ ले गरेको एउटा उदाहरण मात्रै हो ।’ उनले भने, साँच्चिकै भरतपुर भ्रमण २०२४ सफल बनाउने हो भने सबै वडाहरु दृढ संकल्पका साथ यस्ता अभियानहरुमा जुट्नु आवश्यक छ । यो भ्रमण वर्षलाई सबैले अपनत्व हुने गरी लिन जरुरी छ, उनले भने ।

भ्रमण वर्षको नाममा तँछाडमछाड हुने गरी अनावश्यक क्रियाकलापहरु भइरहेकोप्रति संकेत गर्दै नगर उपप्रमुख अधिकारीले भने, ‘यस्ताखालका शैलीबाट तपाइँ हामी सबै पछि हट्न आबवश्यक छ ।’ भ्रमण वर्षलाई भव्यरुपमा सफल बनाउन विकृति–विसंगतिका विरुद्धमा लाग्न र सचेत रहन पनि उनले आग्रह गरे ।

घरघरबाट फोहोर व्यवस्थापनको नियमित अभ्यासलाई जागरुक गराई सचेत गराउन वडा कार्यालय लागिपरेको वडाध्यक्ष दीपक दवाडीको भनाइ छ । अभियानअन्तर्गत फोहोरको उचित व्यवस्थापन गर्नेलाई पुरस्कृत गरिने छ भने फोहोर व्यवस्थापनमा लापर्बाही गर्नेलाई जरिवानाको व्यवस्था गरिएको र त्यसका लागि तीन सदस्यीय मूल्याङ्कन समिति बनेको अध्यक्ष दवाडीले बताए ।

वडा सदस्य विनु दराईको संयोजकत्वमा गठित मूल्याङ्कन समितिले फोहोरको उचित व्यवस्थापन गर्ने उत्कृष्ट व्यक्तिको पहिचान गर्नेछ । उत्कृष्ट व्यक्तिलाई पुरस्कृत गरिने र फोहोर गर्नेलाई कारबाहीका लागि सिफारिस गर्ने मूल्याङ्कन समिति संयोजक दराईले बताइन् ।

राप्ती नदी तटीय क्षेत्र सरसफाइ अभियानको सहकार्यमा प्रत्येक टोलमा पुगेर सचेतना वृद्धि गर्ने काम भइरहेको छ । वडामा २० वटा टोल विकास संस्था, छवटा विद्यालय र तीनवटा सामुदायिक वन छन् । टोल विकास संस्था, विद्यालय र सामुदायिक वनलाई सरसफाइ गर्नका लागि छुट्टाछुट्टै तालिका नै बनाएर काम अगाडि बढाइएको छ । गत असोज ६ गते बाट शुरु भएको मिसन २३ अभियान २८ गते पछि समापन हुने छ ।