गणतन्त्र दिवस अबसरमा चितवनका ६ जना कैदीहरुलाई कैद मिनाहा

जेठ, चितवन । चितवन गणतन्त्र दिवसको अवसरमा कारागार कार्यालय चितवनबाट ६ जना कैदी छुटेका छन् । बिभिन्न अपराधमा संलग्न भएको आरोप प्रमाणित भई ५० प्रतिशत सजाय भुक्तान गरिसकेका ६ जना कैदीहरुलाई बाँकी कैद मिनाहा गरी रिहा गरिएको हो ।

कैद कट्टी नियमावली बमोजिम मापदण्ड पूरा गरेका व्यक्तिलाई कैद मिनाहाका लागि सिफारिस गरिएका मध्ये ६ जनाकोे सजाय कट्टी भएको कारागार प्रमुख जेलर कमल प्रसाद काफ्लेले जानकारी दिनुभयो । प्रक्रिया पूरा गरी आज नै उनीहरुलाई आफन्तको जिम्मा लगाइएको छ  । ज्यान मार्ने उद्योगका ३, सवारी ज्यान सम्बन्धी १, कर्तव्य ज्यान सम्वन्धी १ र झुटो विवरण पेश गरी नागरिकता लिएका १ जना कैदी छुटेको उहाँले बताउनुभयो । कैद मिनाहा भएका मध्ये चितवनका तीन, नवलपरासीका दुई र एक जना भारतीय नागरिक रहेका छन् ।

कारागारको सिफारिसका आधारमा नेपाल सरकारले गणतन्त्र दिवसको अवसर पारेर कैद कट्टी गर्ने गरेको छ । ६ जना छुटेसंगै भरतपुर कारागारमा ३ जना आश्रित बालिका सहित ७ सय ३२ जना कैदिबन्दि रहेका छन् । जसमा ६ सय ७४ पुरुष र ५८ महिला रहेको जेलर काफ्लेले जानकारी दिनुभयो ।

भरतपुर कारागारमा क्षमताभन्दा झण्डै तेब्बर बढि कैदिबन्दि रहेका छन् । यस कारागारको क्षमता २ सय ८० जनाको मात्र छ । जसमा पुरुषको २ सय ५५ र महिलाको २५ क्षमता रहेको छ । नेपालको मध्य भाग र अस्पतालको पहुँचका कारण चितवन कारागारमा कैदीबन्दीको सङख्या धेरै छ ।