परिस्थिति गम्भीर बन्दैछ, हामीले विश्वास गुमाउँदैछऔ : प्रचण्ड

काठमाडौँ। सत्तारुढ नेपाल कम्युनिष्ट पार्टी नेकपाका अध्यक्ष पुष्पकमल दाहाल ‘प्रचण्ड’ले सत्तामा पुगेपछि कम्युनिष्टहरुले आफैलाई सिध्याउने विश्वको इतिहास नेपालमा पनि दोहोरिने खतराका संकेतहरु पैदा भएको बताएका छन्।

भक्तपुरमा नारायणविलास जोशी स्मृति प्रतिष्ठानले आयोजना गरेको भवन शिलान्यास कार्यक्रममा प्रचण्डले आफूले खतरा पैदा भइसक्यो भन्न हतारो हुने भए पनि संकेतहरु त्यस्तै देखिएका बताए। सत्तामा नहुँदा जनताको मन जित्ने कम्युनिष्टहरु शासनमा रहेका बेला भने आदर्शबाट विचलित हुने गरेका विश्वको इतिहास रहेको प्रचण्डको भनाइ थियो।

‘यसो हेर्‍यो भने हाम्रो पनि नियति त्यतै जाने खतराका संकेतहरु’ अहिले भइसक्यो भन्या होइन है फेरि, मेरो भनाइलाई फेरि बढी नबुझियोस्। तर, संकेत त त्यति राम्रा देखिएनन् नि आजभोलि घटना यसो हेर्‍यो भने। मान्छेहरु त बिग्रिने बिग्रिनेतिर जस्तो जो देखिँदैछ, त्यस्तो बेलामा आज नारायण विलासी जोशीजस्ता नेतालाई औपचारिक रुपमा सम्झने मात्रै होइन, व्यवहारमा पनि आदर्श देखाउन आवश्यक छ’, प्रचण्डले भने।

उनले कम्युनिष्टहरु सत्तामा नहुँदा, क्रान्तिमा हुँदा त्याग गर्न सक्ने तपस्या गर्न सक्ने, जनता जहाँ बस्छन्, त्यहाँ बस्ने सक्ने, जनताले जे खान्छन् त्यही खान सक्ने, तर सत्ता प्राप्त गरेपछि त्यो आदर्शबाट विचलित हुने गरेका बताए। उनले आदर्शको राजनीतिलाई फेरि एकपटक स्थापित गर्नुपर्ने बताए।

‘हिजो मृत्युलाई सामना गरेर, जेलनेल, यातना र भयलाई समेत वास्ता नगरेर जनताको मन जित्ने, तर शासन हातमा आएपछि अर्कै अर्कै, यो सबैभन्दा बढी २० औँ शताब्दीमा देखिएको थियो। कम्युनिष्ट पार्टीका नेताहरु आदर्शबाट च्यूत भएपछि, शासनबाट बाहिरिन त्यहाँ पूँजीपति चाहिन्न। बन्दुक पनि चाहिन्न। आफैले आफैलाई सिध्याउने रहेछन्’, प्रचण्डले भने।

सम्बोधनका क्रममा उनले पछिल्लो राजनीतिक घटना क्रमका बारेमा प्रधानमन्त्रीसँग अहिले नै छलफल गर्नुपर्ने भएकाले आफूले सुरुमै मन्तव्य व्यक्त गरेको जानकारी गराएका थिए। सरकारका मन्त्रीहरु नै एकपछि अर्को विवादमा तानिँदै आएपछि नेकपाका अध्यक्ष प्रचण्डले त्यसप्रति गहिरो चिन्ता व्यक्त गर्दै आएका छन्।